Monday, April 30, 2018

කකුල් තියෙන අයට තේරෙන්නේ නෑ එයාලා කොච්චර වාසනාවන්තද කියලා


ඔන්න ඉතින් වෙසක් දවසේ හවස ලාවට නින්දක් දාන් ඉන්න වෙලාවේ  මට මගේ යාලුවෙක්ගෙන් මැසේජ් එකක් එනවා එයා ගොඩක් දුකෙන් ඉන්නේ කියලා.මාත් ඉතින් හොයලා බැලුවා.ඉස්සර ඉදන්ම එක එක්කෙනගේ දුක්ගන්නාරාළ වෙලා මට මාර එක්ස්පීරීයන්ස් තියෙනවා ෆ්රෙන්ස් .ඒ එක්ස්පීරීයස් එකතු කරොත් මට ඒකට ක්ලාස් එකකුත් එක්ක ගෞරව උපාධියක් ගන්න පුලුවන්.😇

හරි දැන් ආපහු මුල් කතාවට ආවොත් ඔන්න මං ඇහුවා මොකද්ද ප්‍රශ්නේ කියලා.ඉතින් මට කියපු විදියට  එයාගේ ප්‍රශ්නේ තමයි එයා යාලු වෙලා ඉන්න කොල්ලා දැන් වෙනස් වෙලා කියන එක.මෙයා කියන හැටියට එයාගෙන් තොර ලෝකයක් නැතිලු.ඒ කොල්ල නැති වුනොත් මගේ යාලුවා මැරෙනවලු.

බනින්න එපා ෆ්රෙන්ස් ඇත්තට නම් මට හිනා ගියා මැසේජ් කියවලා.😁මැසේජ් වලින් මූණ පෙන්නන ඔප්ශන් එකක් නැති එක වාසනාව.නැත්තම් මගේ හිනාව දැකලා මගේ යාලුවා ඒ වෙලාවෙම අභාවප්ප්‍රාප්ත වෙනවා.😏

කෝමහරි මං මගේ යාලුවගෙන් ප්‍රශ්න ටිකක් ඇහුවා.ඔන්න යට තියෙනවා ප්‍රශ්න ටිකයි ඒවගේ උත්තර ටිකයි.මේ මගේ ෆේස්බුක් මිතුරියක් නිසා මේ වගේ ප්‍රශ්න අද්භූත  ගනයට දාන්න එපා පින්වතුනි.

1.ඔයාගේ ගෙදර කවුද ඉන්නේ? අම්මයි තාත්තයි අයියයි මමයි නංගියි.
(සන්තෝසයි පින්වතුනි.මගේ තත්වෙට වඩා හොදයි.මට සහෝදරයෝ කියලා ඉන්නේත් මාවම කන්න ආපු යාලුවෝ විතරයිනේ)😐

2.අයියා මොකද කරන්නේ? අයියා ඉන්ජිනියර් කෙනෙක 😍බැදලා බබෙක් ඉන්නවා 😞නෑනා හරිම හොදයි.ටීචර් කෙනෙක් (ලස්සන පවුලක් නේද ෆ්රෙන්ස් )😘

3.නංගී? එයා කැම්පස්.මෙඩිකල් ෆැකල්ටි (අනේ..දොස්තර කෙනෙකුත් ඉන්නවා  )

4.ඔයා ජොබ් එකක් කරනවා නේද? ඔව් මං .........නනේ වැඩ කරන්නේ (බලන්න ෆ්රෙන්ස් මට රස්සාවකුත්  නෑ)😟

5.හොදයිද ජොබ් එක? සැලරි හොදයිනේ අනේ.ටිකක් දුර එක තමයි ප්‍රශ්නේ.මෙහෙ බ්‍රාන්ච් එකකට හදගන්න ඉන්නෙ ලබන අවුරුද්දේ වගේ.එතකොට ශේප් (ඉරිසියයි ෆ්රෙන්ස්)😐

6.දැන් ඔය කොල්ලා එක්ක යාලු වෙලා කොච්චර කල් ද? අවුරුදු 3යි 💛💕

7.දැන් ඇයි හිතෙන්නේ එයා වෙනස් වෙලා කියලා? දැන් දවස් ගානක්ම වැඩි කතාවක් නෑ අනේ 😒

මේ ඔක්කොම අහලා මට දුක හිතුනා ෆ්රෙන්ස්.එයා ගැන නෙවෙයි මං ගැන.බලන්න ඉතින් .හොද පවුලක්.සහෝදර සහෝදරියෝ පිරිලා.රස්සාවක් තියෙනවා.හොද ගානක් හම්බෙනවා.ඒ මදිවට ගෙවල් ලගට මාරු වෙන්නත් පුලුවන්ලූ.මට මේවා අහලා ඇඩුනා ෆ්රෙන්ස් 😭😭😭

මේකයි ඉතින්.love case අමතක කරොත් එයාට කොච්චර දේවල් තියෙනවද සතුටු වෙන්න.මං එයාට මුකුත්ම කිව්වේ නෑ.මේ පහළ තියෙන වීඩීයෝ එක යැව්වා බලපන් කියලා.

මේ මං කාලෙකට කලින් අහම්බෙන් හම්බ වෙලා බලපු දෙයක්.කවදාවත් මේක අමතක වෙන්නේ නෑ.

"කකුල් තියෙන අයට තේරෙන්නේ නෑ එයාලා කොච්චර වාසනාවන්තද කියලා"


Monday, April 16, 2018

බෝඩිමේ ළිද


මේක වුනේ මගේ පලවෙනි බෝඩිමේදි.මේ ගැන ඇත්තටම දන්නේ මායි අම්මායි විතරයි.කතාව කියන්න කලින් කියන්නම්කෝ බෝඩිමට ගියපු හැටි.

2013-04-17 කියන්නේ මට ගොඩාක් විශේශ දවසක්.සරසවිය සිහිනයක් පමණයි කියලා අතැරලා දාලා හිටපු කාලෙක එක පාරටම ලියුමක් එනවා ගෙදරට කැම්පස් සිලෙක්ට් කියලා.ඒ කාලේ දැන් වගේ නෙවෙයි.ලියුම එන්නම ඕනේ කැම්පස් සිලෙක්ට් ද දැනගන්න.  ඉතින්  ඒ අප්‍රේල් 17 ආපු ලියුමේ තිබුනේ අප්‍රේල් 22 කැම්පස් පටන් ගන්නවා.එදාට ඇවිත් රෙජිස්ටර් වෙන්න කියලා.දවස් 5යි තියෙන්නේ හැමදේටම.

එන්න කිව්වේ 22 වුනාට තාත්තා කිව්වා අපි හෙට යමු රෙජිස්ටර් වෙන්න කියලා.ඒ ගමන් බෝඩිමකුත් හොයාගන්නයි හිතාගත්තේ.මගේ තාත්තා ගැන කියන්නම්කෝ මුලින්ම.මගේ තාත්තා කියන හැටියට අපායට වුනත් යනව නම් කලින් යන්න ඕනේ.හිතන්නකෝ අපට උදේ 8ට යන්න ඕනේ කියලා තැනකට.තාත්තා මාව එතනට යවනවා 6.30ට.අන්න එහෙමයි අපේ තාත්තා.😎

ඉතින් තාත්තයි මායි 18 උදේම පිටත් වුනා කැම්පස් එකට යන්න.බස් 2ක ගිහින් උදේ 11 විතර වෙනකොට අපි කැම්පස් එකට ඇවිත් රෙජිස්ටර් වුනා.ඒ වෙලාවේ තමයි මට කැම්පස් එකේ පලවෙනි යාලුවා හම්බුනේ.ඒ යාලුවා පස්සේ කාලෙක මාලුවා වුනා .ඒක වෙනමම කතාවක්.

එයත් තාත්තා එක්ක ඇවිත් හිටියේ.ඉතින් තාත්තලා දෙන්නයි අපි දෙන්නයි පිටත් වුනා බෝඩිම් හොයන්න.එහේ තියෙනවා "කෝරළේවත්ත" කියලා පැත්තක්.එහේ තමයි කිව්වා බෝඩිම් තියෙන්නේ.ඔන්න ඉතින් හැමතැනම ඇවිදලා ඇවිදලා බෝඩිමක් හොයාගත්තා.ඒක වෙනම ගෙදරක්.2nd year අක්කලා දෙන්නෙකුත් හිටියා වෙනම කාමරේක.අපට හම්බුන කාමරේ ඇදන් 4ක් එකට අහුරලා තිබුනා.රෙදි වැටකුයි පොඩි රාක්කෙකුයි තිබ්බා.එච්චරයි.ඒක තමයි හොයාගන්න පුලුවන් වුන හොදම කාමරේ.ඉතින් හිතාගන්නකෝ අනිත් බෝඩිම්.අපේ අනිත් ඇදන් දෙකට කවුරුවත් ඇවිත් හිටියේ නෑ.ඔන්න ඉතින් බෝඩිමට සල්ලි දිලා අපි ගෙදර එන්න ආවා.

ඒ ඉතුරු දවස් 4 යුද්දයක් වගේ.මං කවදාවත් බෝඩිමක ඉදලා නෑ.ඉතින් ගෙනියන්න දේවල් ලිස්ට් කරලා කඩේ ගිහින් බඩු ගෙනැල්ලා ඒවා ඔක්කොම පැක් කරලා ඉවර වෙනකොට දවස් 4 නිකන්ම ගිහින්.වැඩ වැඩි නිසා බය වෙන්නවත් වෙලාවක් තිබ්බේ නෑ.අප්‍රේල් 21 හවස අපි බඩුත් අරන් බෝඩිමට යන්න පිටත් වුනාම තමයි මං බයේ ගැහෙන්න ගත්තේ.යන්නම බෑ වගේ මට.මං පවුලේ එකම ලමයා.ඉතින් අම්මලා නැතුව ඉදලම නෑ.බෝඩිමට ආවම අර මගේ යාලුව ඇවිල්ලත් නෑ ඒ වෙනකොට.මං හොදටම බය වෙලා.ඒත් එහෙම කෝමද බයයි කියලා පෙන්නන්නේ.මං ඉතින් ෆුල් ගැම්මෙන් හිටියා අම්මලා යනකම්ම.අම්මලා ඉතින් ඔක්කොම බඩු එහෙම ලැස්ති කරලා දීලා පිටත් වුනා විතරයි මං හිතේ බයටයි හිතේ දුක යන්නයි හොදටම ඇඩුවා.😓

අඩලා ඉවර වෙලා ඉතින් ඔන්න ළිද ලගට ගියා නාන්න කියලා.ඇතුලෙත් නාන කාමරයක් තිබ්බත් ඒ වෙනකොට ඒකේ දොර වහලා තිබ්බ නිසා තමයි ළිදට ගියේ.අහන්නත් බයයි නේ.ඇත්තම කියනවා නම් මං ළිදකින් වතුර ඇදලම නෑ ඒ වෙනකොට.ඒ වුනාට ඉතින් එහෙම කියලා බෑනේ.අනික කැම්පස් සිලෙක්ට් වෙච්ච මට වතුර එකක් ඇදගන්න බැරිද ළිදෙන්.හපෝ...එහෙම හිතුවත් ලැජ්ජයිනේ.(ඒ කාලේ ඉතින් කැම්පස් කියලා පොඩි උණක් තිබ්බා.ඒ උණ කැම්පස් පය ගහපු වෙලාවෙම නැති වුනා).😝

ඔන්න ඉතින් නාන්න ලැස්ති වෙලා බාල්දිය ලිදට දාලා වතුර එකක් ඇද්දා කියන්නකෝ.ඒත් මේක උඩට ගන්න බෑ බරයි.

සෑහෙන්න ට්‍රයි කරා.කොහෙද බෑ.

මේ සැරේ අදිනවාමයි කියලා හිතලා ඇද්දා උඩට.වතුර ටික උඩින් වීසී වුනා.ඒත් එක්කම ළිද ලග ලිස්සලා මං එතන පත බෑවුනා.

අම්මෝ.... ඇගේ ඇට  කැඩිලා වගේ රිදෙනවා..නැගිටගන්න බෑ.කදුලු බේරෙනවා.හිතේ අමාරුව වැඩියි ඇගේ අමාරුවට වඩා.ඒත් එහෙම කියලා ඉන්න බෑනේ.ගෙදර නෙවෙයිනේ.අමාරුවෙන් නැගිටගත්තා.😶

පොඩ්ඩක් හීරීලා මිසක් වෙන තුවාලයක් නම් නෑ.කොන්ද නම් කැඩිලා වගේ රිදෙනවා.දැන් ඉතින් නාන්න නම් බෑ.ඇග හෝදගෙන යනවා කියලා හිතලා බාල්දිය ගන්න බැලුවා.

දෙයියෝ සාක්කී... කෝ බාල්දිය 😨

හැමතැනම බැලුවා.කෝකටත් කියලා නිකමට වගේ ළිදට එබුනා.මෙන්න බොලේ බාල්දිය ළිදේ.

මේ කලබලේ අස්සේ බාල්දිය ළිදට වැටිලා.දැන් මොකෝ කරන්නේ.දැන් මට ඇගේ අමාරුවක් මතක නෑ.බයටම දාඩියත් දාලා මට.ගන්න විදියක් හිතාගන්නත් බෑ.හොද වැඩේ මටත් තනියෙන් පන්ඩිත වැඩ කරනවට.මට මාත් එක්කම තරහයි.

ඔන්න ඒ අස්සේ මට ගණ දෙවි නුවණ පහළ වුනා.ඒ වෙනකොට බෝඩිමේ අක්කලා ඇවිත් හිටියෙත් නෑ.බෝඩිමේ ඇන්ටි ඉන්නෙත් වෙනමනේ.ඉතින් මං මෙතනට නාන්න ආවා කියලා කවුරුවත් දන්නේ නෑ.පත්තරේ දාලා නාන්න යන්නේ නෑනේ.😏

ඉතින් මං ශේප් එකේ ඇදුම් ආපහු ඇදගෙන දුවලා දුවලා ගියා බෝඩිමේ කාමරේට.දැන් හරි.කවුරුවත් දන්නේ නෑ වෙච්ච දේ.මට හරි සතුටුයි මේකෙන් බේරුනු එකට.එහෙම්ම ඇදට වැටුනා මං.ඇදට වැටිලා විනාඩි දෙකක් ගියේ නෑ බෝඩිමේ ඇන්ටි කතා කරනවා එලියෙන්.

"දුව... "

මට දැන් බයේ බෑ.බාල්දිය ගැන අහන්න තමා මේ ඇවිත් ඉන්නේ කියලා මට හොදටම විශ්වාසයි.ඒත් එහෙම කියලා හැංගිලා ඉන්නත් බෑනේ.මං ගට් අරගෙන ගිහින් දොර ඇරියා.😐

"අහ් ඇයි ඇන්ටි" මගේ කටහඩත් වෙව්ලනවා.

"අනේ දුව මට බාත් රූම් එකේ දොර අරින්න බැරි වුනානේ.නිවාඩු කාලෙට අපි කාමර ලොක් කරනකොට ඒකත් ලොක් කරනවා" ඇන්ටි එහෙම කියාගෙනම ගිහින් ඇතුලේ නාන කාමරේ දොර ඇරියා.
මට ඒ වෙලාවේ ඇන්ටිව පෙනුනේ දෙයියෙක් වගේ.ඒත් ඉතින් ඇන්ටිට තිබ්බේ ඕක කලින් ඇරලා තියන්නනේ.එහෙම වුනා නම් මේ කිසි දෙයක් නෑනේ.😐😕

"ඔන්න දැන් දුවට නාගන්න පුලුවන්.කෑම අරන්ද දරුවෝ ආවේ රෑට"
ඇන්ටි ඉතින් කතාවක් පටන් ගන්න ලැස්තිය.දැන් මගේ හාර්ට් බීට් ඒක කූල් වේගෙන යනවා.මට දැන් ඕනේ ඇන්ටිව යවලා නාගෙන ඇදට වැටෙන්න.

හැබයි ඇන්ටි ගියේ තවත් පැය කාලක් විතර කියවලා.

ඇන්ටි ගියාට පස්සේ මං දෙයියනේ කියලා නාන කාමරෙන් නාගත්තා.නාගෙන ඇවිත් අම්මා දීපූ බාම් එකකුත් තැලිච්ච තැන් වලට ගාගත්තා.
ආපහු නම් මං ඒ බෝඩිමේ ළිදෙන් නාන්න තියා ඒ පැත්තෙන්වත් ගියේ නෑ.

ප.ලි. හැබැයි දැන් නම් මට ළිදෙන් වතුර ඇදන් නාන්න පුලුවන්.ඒක පුරුදු වුනේ වෙන බෝඩිමක ළිදකින් 😅😎




Monday, April 2, 2018

දන්න Pizza ගැන නොදන්නා කතා

අතීතයේදි  සාම්ප්‍රදායික ඉතාලි ආහාරයක් ලෙස හැදින ගෙන තිබූ Pizza අද ලෝකයේ ජනප්‍රියතම  ආහාරයක් යැයි පැවසීම අතිශෝක්තියක් නොවෙයි.සාම්ප්‍රදායික ලෙස යීස්ට් රොටියක් මත තක්කාලි සෝස් සහ චීස් යොදා පුලුස්සා ගැනීමෙන් සාදා ගන්නා මෙයට උඩින් විවිධ එලවලු ,මස් වර්ග සහ විවිධ කුළු බඩු වර්ගද  එකතු කරගැනීමේ හැකියාව තිබෙනවා.මේ අපි දන්නා Pizza ගැන නොදන්නා කතා කීපයක්.


ඉතිහාසය 

Pizza හී ආරම්භය ඉතා ඈත අතීතයට දිව යන්නක් .නියෝලිතික සමයේ සිටම  පාන් සමග වෙනස් රසයන් මුසු කිරීම සිදු වී ඇති අතර අතීත ග්‍රීකයන් පාන් සමග තෙල්,පැලෑටි සහ චීස් ආහාරයට ගෙන තිබෙනවා.පළමුවෙන්ම Pizza ගැන සදහනක් වෙන්නේ 10 වන ශතවර්ශයේදී වුවත් නවීන Pizza හී ආරම්භය සිදු වී ඇත්තේ 18 වන හෝ  19 වන ශතවර්ශයේ නේපල්ස් නගරයේදීය.මෙම කාලයේදී පැතලි පාන් මතට සුදු ළුනු,ලුනු,ඌරු තෙල්,චීස් සහ බැසිල් යොදා Pizza නිපදවා ඇති මුත් Pizza සෑදීමට තක්කාලි එකතු කිරීම ආරම්භ කල කාලයක් ගැන නිශ්චිතව සදහනක් නෑ.1830 වන තෙක්ම Pizza අලෙවි කර ඇත්තේ එලිමහනේ හෝ Pizza බේකරි වල ඉදිරිපසයි.අපි මේ අද Pizza ලෙස ආහාරයට ගන්නා පිලිවලට Pizza එකක් ප්‍රථම වතාවට නිශ්පාදය කරනු ලැබුවේ 1889දී මාර්ගරීටා රැජින පිලිගැනීමට වන අතර ඒ නිසාම එයට "පීසා මාගරීටා" යන නමද භාවිතා කෙරුනා.

පුරාණ කාලයේ එලිමහනේ Pizza සාදන ආකාරය දැක්වෙන සිතුවමක්./https://pizzanapoletanismo.com

19 වන ශත වර්ශය අග භාගයේදි ඉතාලි සංක්‍රමණිකයන් පිරිසක් විසින් Pizza ඇමරිකා එක්සත් ජනපදයට හදුන්වා දුන් අතර 1905දී ඇමරිකා එක්සත් ජනපදයේ පළමු Pizza අවන්හල විවෘත කරන ලදී.දෙවෙනි ලෝක යුද්ධයෙන් පසු ආපසු සිය රටට පැමිණි ජනයා අතර මේ ඉතාලි ආහාරය ඉතා ජනප්‍රිය වීමත් සමගම ඇමරිකා එක්සත් ජනපදය පුරා මෙම ආහාරය ජනප්‍රියත්වයට පත් විය.අද වන විට  Domino's, Pizza Hut සහ Papa John's වැනි Pizza සදහාම වූ අවන්හල් ජාලා ලෝකය පුරාම විසිරි පැතිරී ඇති අතර එයට අමතරව සීත කල Pizza හා නිවසේදි  ඉකමනින් සාදා ගත හැකි Pizza වර්ගද සුපිරි වෙලද සැල් වලින් ලබා ගැනීමේ හැකියාව තිබෙනවා.

Pizzafest සැණකෙලිය 

Pizzafest සැනකෙලියේ දර්ශනයක්  /https://www.tastecapade.com

සෑම වසරකම සතියක කාලයක්  දකුණු ඉතාලියේ නේපල්ස් නගරය ඉතා සුන්දර හා රසවත්  සැනකෙලියක් බවට පත් වෙන්නේ  Pizzafest ලෙස හැදින්වෙන ලොව විශාලතම  Pizza  සැනකෙලිය සදහායි.මේ  සැණකෙලියේදි  විවිධ රස ඇති නවතම  Pizza රස බැලීමට මෙන්ම Pizza සෑදීමේ තරග වලට සහභාගී වීමේ අරමුණින් නේපල්ස් කරා ඇදී එන සංචාරකයන් බොහොමයි.Pizza දිනයක් වෙන් කර මුල් වරට සමරන ලද්දේ 1995දී වන අතර මේ වන විට සෑම වසරකම දින 5-7 අතර කාලයක් පුරාවට නේපල්ස් නගරයේදි මෙය සමරනු ලබනවා.මෙහිදි සාම්ප්‍රධායික Pizza හා ලොව පුරා ඇති නවතම Pizza රස බැලිමේ අවස්ථාව සැණකෙලියට සහභාගි වන්නන්ට  හිමි වෙන අතර සතිය අවසානයේ විනිශ්චය මණ්ඩලයක් විසින් මේ සියල්ල විනිශ්චය කරනු ලබනවා

Pizza වාර්තා 

ලොව විශාලතම Pizza එක 

ලොව විශාලතම Pizza එක නිර්මාණය වී ඇත්තේ 2012 දෙසැම්බර් මස රෝමයේදි වන අතර එහි ප්‍රමාණය වර්ග මීටර් 1261 බව කියවෙනවා.මෙය පළමු රෝම අධිරාජ්‍යා සිහි වීම පිණිස "Ottavia"ලෙස නම් කර ඇති අතර මෙය ග්ලුටෙන් රහිතව නිශ්පාදනය කර තිබීම විශේෂත්වයක්.

ලොව දිගම Pizza එක 2016දී නේපල්ස්  හීදී නිශ්පාදනය කෙරුණු අතර එහි දිග කිලෝ මිටර් 1.85කි.

ලොව දිගම Pizza ආහාරය 

ලොව මිල අධිකම Pizza ලෙස ගිනස් වාර්ථා පොතට ඇතුල්ව ඇත්තේ ලන්ඩනයේ පිහිටි අවන්හලක නිපදවෙන Pizza විශේෂයක් වන අතර මෙය අලෙවි වන්නේ ස්ටර්ලින් පවුම් 100ක මුදලකටයි.මෙම Pizza වර්ගය සෑදිමට ලොව මිල අධිකම හතු වර්ග හා චීස් වර්ග යොදා ගැනෙන අතර එය පුළුස්සා ගනු ලබන්නේද දර උදුනකයි.මීට වඩා මිල අධික Pizza වර්ග විවිධ අවස්ථා වල නිපදවා ඇති මුත් ඒවා කිසිවක් ගිනස් වාර්ථා වලට ඇතුලත්  වී නෑ.

සෞඛ්‍යය අවධානය 

http://www.nbpizzaworks.com/

ඉතා විශාල ප්‍රමාණ වලින් Pizza නිශ්පාදනය කෙරෙන ක්ෂණික ආහාර අවන්හල් වල සෞඛ්‍යයට අහිතකර අමු ද්‍රව්‍යය යොදන බවට චෝදනාවක්ද ඇති වී තිබෙනවා.Pizza හී ලුනු සහ තෙල් ප්‍රමාණය ඉහළ යාම මෙයට බලපා ඇති අතර මෙය සෞඛ්‍යයට ඉතා අහිතකර බලපෑම් ඇති කරනු ලබනවා.Pizza ආහාරයට ගැනීමේදී එය ශරීරයට බලපාන ආකාරය Pizza හී අන්තර්ගත ද්‍රව්‍ය වර්ග අනුව වෙනස් වන මුත් පොදු මතය නම් එහි ලුනු ප්‍රමාණය ඉතා අධික බවයි.

Pizza යනු කොහෙත්ම පැණි රස කෑමක් නොවන නමුත් එහි සීනී ද අන්තර්ගත වෙනවා.චීස් Pizza කැබැල්ලක සීනී ග්‍රෑම් 5ක්ද මස් සහ එලවලු Pizza කැබැල්ලක සීනී ග්‍රෑම් 7ක්ද අඩංගු බව කියවෙනවා.සාමාන්‍ය කාන්තාවක් දවසට ගත යුතු උපරිම සීනී ප්‍රමාණය ග්‍රෑම් 24ක් වන අතර පිරිමි අයෙක් ගත යුතු උපරිම සීනී ප්‍රමාණය ග්‍රෑම් 36ක් ලෙස දැක්වෙනවා.එසේ බලන කල Pizza අනුභවය දියවැඩියා රෝගින්ට කොහෙත්ම හිතකර වෙන්නේ නෑ.

Pizza හී අඩංගු මේදය  ප්‍රමාණය රදා පවතින්නේ එහි ඇති එලවලු මස් හා චීස් ප්‍රමාණය මත වූවත් සාමාන්‍ය මතය නම් එහි ඇති මේද ප්‍රමාණයෙන් සැලකිය යුතු ප්‍රමාණයක් අසංතෘප්ත මේදය බවයි.මෙය කොලොස්ට්‍රෝල් වැනි ලෙඩ බොහෝ ප්‍රමාණයකට මූලික හේතුවක් සේ සැලකෙනවා.

 මුලාශ්‍ර - https://en.wikipedia.org/wiki/Pizza





   

රහස් ඔත්තුකාරියක වූ අබිසරුලිය, මාතා හරී

ලෝකයේ විවිධ කාල වල විවිධ ආකාරයේ රහස් ඔත්තුකරුවන් ඔත්තුකාරියන් දකින්න හැකියාව තිබෙනවා.ඒ නමුත් රහස්  ඔත්තුකාරියකගේ ජීවිත කතාව පස් වරක් සිනමාවට නගා දෙවරක් නවකතාවක ලෙසින් ලියා පල කර සංගීත නිර්මාණද හතරක් සිදු කර ඇත්නම් ඒ මාතා හරී ම පමණයි.මාතා හරී යනු රහස් ඔත්තුකාරියක් මෙන්ම  වෘර්තීය නාට්‍යාංගනාවක් හා  අබිසරුලියක් ලෙසද  සලකනු ලබනවා .පළමු ලෝක යුද්ද සමයේ ඔත්තුකාරියකව සිටි  මාතාහරී ගේ ජීවිත කතාව මේ තරම් වෙනස් සහ සුවිශේෂී  වන්නේ ඇයි? මේ ලිපිය එ පිලිබදවයි.

www.thedailybeast.com

ළමා කාලය 


1876 වර්ශයේ අගෝස්තූ 7 වන දින නෙදර්ලන්තයේ  ලියුවොර්ඩන් හීදී  උපත ලැබු මාගරීටා  ගර්ට්‍රියුඩා සෙල්ලේ දරුවන් හතර දෙනෙක් සිටි පවුලක වැඩිමල් දරුවා වූවා ය.ඇයගේ පියා ඇඩම් සෙල්ලේ ටත් මව වූ ඇන්ටි ජේ වැන් ඩී මවුලර්  ටත්  මාගරීටා අමතරව බාල  පුතුන් තිදෙනෙක් විය.හිස්වැසුම් අලෙවිසැලක් තිබූ මාගරීටාගේ පියා තෙල් කර්මාන්තය තුළද මුදල් ආයෝජනය කිරීමෙන් ඉහළ ආදායමක් ලැබීම හේතුවෙන්  ඇයට අවුරුදු 13ක් වන තෙක් සුපෝඛභෝගී ජීවිතයක් ගත කිරීමට හැකි වූ අතර ඇයටම වෙන් වූ පාසලක ඉගැනුම ලැබීමටද ඇයට වාසනාව ලැබුණී. 1889දී සිදුවූ පියාගේ බංකොලොත් වීමත් ඊට ටික කාලෙකට පසු සිදු වූ දෙමාපියන්ගේ දික්කසාදයත් නිසා සිදුවූ අතර  මාගරීටාගේ පියා නැවත වරක් සුසාන කැතරිනා නම් කාන්තාවක සමග විවාහ වූයේ ය.ඔවුන්ට දරුවන් නොමැති වීම හේතුවෙන් මේ විවාහය වැඩිකල් නොපැවතුණේය.මේ අතර මාගරිටා ස්නීක් හී  සිටි තම භාරකාර පියා වූ වීසර් තමග ජීවත් වීමට පටන් ගත්තාය.මෙහෙදී ඇය ළදරු පාසල් ගුරුවරියක් වීමට ඉගෙනුම ලැබුවද එහි විදුහල්පතිවරයා ඇය සමග සමීප වීමට උත්සහ දැරීම නිසා ඇයගේ භාරකාර පියා විසින් ඇයව පාසලෙන් ඉවත් කරගන්නා ලදී.ඊට මාස කීපයකට පසු මාගරීටා හේග් හී සිටි තම මාමාගේ නිවසට පලා ගියා ය.

විවාහය 

ඉන්දුනීසියාවේ සේවය කළ ලන්දේසි ජාතික යටත් විජිත හමුදා කපිතාන්වරයෙක් වූ රැඩොල්ෆ් මැක්ලියොඩ් විසින් පුවත්පතක පළ කර තිබූ මංගල දැන්වීමක් දකින මාගරීටා එම දැන්වීමට පිළිතුරු යැව්වා ය.එහි ප්‍රතිඵලයක් ලෙස මාගරීටා තමන්ට වඩා දෙගුණයක් වයසැති කපිතාන්වරයා සමග 1895 ජුලී මස 11 වන දින විවාහ වූවා ය.මෙම විවාහයෙන් ඔවුන් දෙදෙනාට නොර්මන් ජෝන් මැක්ලියෝඩ් සහ ලුවී ජියාන් මැක්ලිලෝඩ් ලෙස දරුවන් දෙදෙනෙක් ලැබිණි.


1897දී ගත් ජායාරූපයක් 

කෙසේ වුනත් ඔවුන්ගේ විවාහය සතුටුදායක විවාහයක් නොවිණි.රුඩොල්ෆ් මත්පැන් පානයට ඇබ්බැහි වූවෙක් වූ අතර දිනපතාම   මත්පැන් පානය කොට පැමිණ මාගරීටාට පහර දීම සිරිතක් ලෙස සිදු කළේය.ඔහු නිරන්තරයෙන්ම ඇයට චෝදනා කරේ තම උසස් වීම නොලැබීමට හේතුව ඇය බව පවසමිණි.මෙයින් නතර නොවුනු රැඩොල්ෆ් එකළ ඉන්දුනීසියාවේ සිරිතක් ව පැවති ලෙස ප්‍රසිද්දියේම තවත් කාන්තාවන්  ඇසුරු කිරීමට පටන් ගත්තේ ය.මෙයින් සිදු වූයේ මාගරීටා රැඩොල්ෆ්ගෙන් වෙන් ව වෙනත් ලන්දේසි කපිතාන්වරයෙකු වූ වෑන් රීඩ්ස් සමග ජීවත් වන්නට පටන් ගැනීමයි.මේ කාලයේදී ඉන්දුනීසීයානූ සම්ප්‍රදායන් හොදින් හැදෑරූ මාගරීටා දේශිය නර්තන සමාගමක් හා සම්බන්ද වූවා ය.1897දී ඇය කලා ලෝකයට අවතීණ වූයේ "මාතා හරී" නම් නව නමකිනි.ඉන්දුනීසියානූ බසින් එහි අර්ථය 'ඇස' හෝ 'සූර්යයා' ලෙස හැදින්වීය හැක.

මේ අතර රඩොල්ෆ්ගේ දැඩි ඉල්ලිම මත ඇය නැවත ඔහු වෙත යන නමුත් ඔහුගේ නොහික්මුනු හැසිරීම් වල වෙනසක් නොදකින මාගරීටා වැඩි අවධානය තම කලා හැකියාවන් දියුණු කර ගැනීම සදහා යොමු කළාය.1899 දී ඔවුන්ගේ දරුවන් දෙදෙනාම දැඩි ලෙස රෝගී වූ අතර රෝගය උත්සන්න වීමෙන් නෝර්මන් මිය ගියේ ය.කෙසේ වූවත් පවුලේ අය නම් සැක කලේ මෙය රැඩෝල්ෆ් ගේ සතුරෙක් විසින් දරුවන්ට වස දිමෙන් සිදු වූ දෙයක් ලෙසටයි.මෙයින් පසුව රැඩොල්ෆ්  හා මාගරීටා නැවතත් නෙදර්ලන්තයට පැමිණි අතර 1906 දී ඔවුන් නීතියෙන් වෙන් විණි.නීතියෙන් ජීයාන්ගේ බරකාරත්වය හිමිවූයේ මාගරිටා ට වුවත් රැඩොල්ෆ් වන්දි මුදලක් නොගෙවූ නිසා ඔවුන්ට මහත් අගහිගකම් මැද ජීවත් වීමට  සිදු විය.මේ අතර දිනක් ජියාන් තම නිවසට ගෙන්වා ගත්  රැඩොල්ෆ් ජියාන් තමන්ගේ බාරයට ගත්තේය.මෙයට විරුද්ද වීමට තරම්වත් මුදල් අතේ නොතිබුණු මාගරීටා දියණිය පියා ලග තැබීමට එකග වුවා ය.

දියණිය ජියාන් 


පුතු නෝර්මන්   හා රැඩොල්ෆ් 

ප්‍රංශයේ ගත කළ කාලය 


1903දී ප්‍රංශයට ගිය මාගරීටා සර්කස් කණ්ඩයමකට එකතු වූ අතර මුදල් අගහිගකම් නිසාම සිතුවම් ශිල්පීන්ගේ සිතුවම් සදහා පෙනී සිටිමටද පටන් ගත්තා ය.1905 වන විට ඇය නර්තන ශිල්පිනියක ලෙස අතිශය ප්‍රසිද්දියට පත් වූවා ය.1905 ගිමෙට් කෞතුකාගරයේදි කල නර්තනයෙන් අතිශය ජනප්‍රියත්වට පත් වූ ඇය ඒ සමගම කෞතුකාගාරයේ නිර්මාතෘ වූ එමිලි ටියෙන් ගිල්ට් ගේ දිගු කාලින ආර්‍යාව බවටද පත් වූවා ය.මාගරීටාගේ නර්තනයන් වල ප්‍රධාන අංගයක් වූයේ ඇදුම් උනා දැමීමයි.සියලුම ඇදුම් වුනා දැමූ ඇය අවසානයේදි නර්තනයේ යෙදුනේ  මැණික් ඇල්ලූ තන පටයකින් පමණක් සැරසී ගෙන ය.පැරීසියෙන් ආරම්භ කල මේ නර්තන ජිවිතය නිසා මාගරීටා 'මාතාහරී' ලෙස ලොව පුරා ජනප්‍රියත්වයට පත් වූවා ය.ඇය තමන් ලන්දේසි කාන්තාවක බව සැගවූ නිසා සියලු දෙනා සිතුවේ ඇය  ඉන්දුනීසියානු කාන්තාවක බවයි.



1905 දී නර්ථනය ඉදිරිපත් කරමින් 

ඔත්තු සේවය 

1912 වන විට ඇයගේ නර්තනය නිසා ඇතිවූ උන්මාදය අඩු වෙන්නට පටන් ගත්තේය.ඒ සමගම ඇය කෙමෙන් අබිසරුලියක් බවට පත් වූවා ය.මෙහි ප්‍රතිඵලයක් ලෙස ඇයට බොහො උසස් හමුදා නිලධාරීන්, දේශපාලනයේ නියුතු වූවන් හා රාජ තාන්ත්‍රික පුද්ගලයන් ඇසුරු කිරීමේ භාග්‍යය හිමි විය.බොහො පුද්ගලයෝ  කිසිම ප්‍රශ්න කිරිමකින් තොරව ඇයව දේශ සීමාවෙන් පිටතට රැගෙන ගියේ ය.නේදර්ලන්ත අනන්‍යතාවයක් සහිත වූ මාගරිටා සෙල්ලේ නිතර නිතර ප්‍රංශය සහ නෙදර්ලන්තය අතර ගමන් කරේ බ්‍රිතාන්‍යය හරහා වීම ගැන  බ්‍රිතාන්‍ය හමුදාවන් සැක පහළ කළේ ය.පසුව ප්‍රංශ වෙනුවෙන් ඔත්තු ඇලු බවට සැක පිට මාගරීටා අතඩංගුවට එන ප්‍රශ්න කලත් කිසිවක් හෙළි නොවුන තැන ඇය නිදහස් කර හැරිණි.

මේ අතර ජර්මන් හමුදාවෙන් කේත සහිතව යැවූ පණිවිඩ කිහිපයක් විකේතනය කල බ්‍රිතාන්‍යයේ හමුදාව  H 21 ලෙස නම් වූ ජර්මන් ඔත්තුකරුවෙකු පිලිබද  හදුනා ගත් අතර වැඩිදුර පරික්ශන වලින් එලි වූයේ H 21 යනු මාතා හරී බවයි. 1917 පෙබරවාරි 13 පැරීසියේ එලිසේ පැලස් හෝටලයේදී මාගරීටා අත්ඩංගුවට පත් වන්නේ ජර්මනියට ඔත්තු සැපයිමේ චෝදනාව හේතුවෙනී.ප්‍රංශයත් මහා බ්‍රිතාන්‍යයත් මෙසේ ඇයට චෝදනා එල්ල කරත් ඒ පිළිබද කිසිදු පහැදිලි ප්‍රබල සාක්ශියක් සොයාගැනීමට නොලැබුණි.කෙසේ වූවත් ඇයව බේරාගැනීමට නොහැකි වූ අතර නඩු තීන්දුවෙන් ඇයට වෙඩි තබා මරා දැමීමට නියම විය.

1906දී ගත් ජායාරූපයක් 

ඒ අනුව ඇය 1917 ඔක්තෝබර් 15 වන දින වෙඩි තබා ඝාතනය කරන ලදී.වාර්තා වල සදහන් වන පරිදි ඇය ඇස් වසා ගැනීමට දුන් සුදු රෙදි කඩ ද ප්‍රතික්ශේප කර වෙඩි පහර දෙස කෙලින් බලාගෙන ජිවිතයට සමු දුන් බව කියවේ.එමෙන්ම වෙඩි පහර ලබාදීමට පෙර ඇය වෙඩි තැබීමට පැමිණි ප්‍රංශ සොල්දාදුවන්ට හාදුවක් පා කර යැවූ බවද වෙඩි පහර එල්ල වීමේදි ඇය හැකිතාක් හිස කෙලින් තබා ගත් බව ද කියවේ. මාතා හරිගේ පවුලේ කිසිම කෙනෙක් ඇගේ සිරුර බාර ගැනීමට අකමැති වූ නිසා සිරුර වෛද්‍ය විද්‍යාලයක අධ්‍යයන කටයුතු සදහා බාර දුන් බව කියවේ. 

නෙදර්ලන්තයේ ලියුවොර්ඩන් කෞතුකාගරයේ මාතා හරි වෙනුවෙන් වෙන් කල වෙනම කුටියක් ඇති අතර එහි ඇත්තේ ඇගේ පෞද්ගලික පින්තූර පොතක් සහ ඇගේ නර්ථනය විදහා දැක්වෙන සේ කල එම්බ්‍රොඩර් නිර්මාණයකි.

නෙදර්ලන්තයේ ලියුවොර්ඩන් කෞතුකාගරය ඉදිරිපිට ඇති මාතා හරී ගේ ප්‍රතිමාව 


මාතා හරී ගේ පින්තූර පොත 


මුලාශ්‍ර - https://en.wikipedia.org/wiki/Mata_Hari
            








මන්දාරම් අහස යට - දහතුන් වන කොටස

"මං ආදිත්‍ය.අසේලිගේ බෝයි ෆ්‍රෙන්ඩ්.ඔයා කවුද?" ආදිත්‍ය කියද්දි ගගනගේ වගේම අසේලිගෙත් ඇස් ලොකු වුනා. "මං කැම්පස් එකේ...