Friday, June 29, 2018

ආදරණීය නපුරා - තිස් හය වන කොටස


සහන් එදා ඔෆිස් එකේ වැඩ කරේ වෙනදා තරම් උවමනාවකින් නෙවෙයි.සජිනි පාස්වර්ඩ් දැනගත්තේ කොහොමද කියන එකටත් වඩා සජිනි මොනවා හිතුවද කියන එක ගැන ගැනයි සහන් කල්පනා කරේ.

ඒත් තත්වේ බරපතළ වුනේ සහන් හදපු රිපෝර්ට් එකකුත් වැරදිලා ආයෙත් හදන්න වුනාට පස්සේ.

"මොකෝ කේස් එක?" විහග ඒ වෙලාවේ කාමරේට ආවේ ලොක්කා සහන්ට පලු යන්න බනිනවා ඇහුන නිසා 

"කේස් එක උබට පේන්න ඇතිනේ.දැන් පලයන්.උබ එක්ක සතුටු සාමිචි දාන මූඩ් එකක් නෑ මට"

"කියපන් බං.උබ ඕවා තනියෙන් හිතේ තියන් නහින හින්දා තමා මේ ඔක්කොම" විහග සහන්ගේ මේසේ ඉස්සරහ පුටුවෙන් වාඩි වුනේ එහෙම කියාගෙන 

"පලයන්කෝ කිව්වම, උබ මෙතන ඉන්නවා දැක්කොත් තව ලෙඩක් වැටෙන්නේ මට" සහන් ඒ සැරේ නම් කිව්වේ තරහෙන් 

"හරි හරි එහෙනම් අපි කැපෙන්නම්කෝ.වරෙන්කෝ ආය අරක මේක අහගෙන" එහෙම කියපු විහග පුටුවෙන් නැගිට්ටේ යන්න හිතාගෙන 

"වාඩි වෙයන්" සහන් කිව්වේ හොද  හුස්මකුත් පහල දාලා 

"හරි කියපන් බලන්න" විහග ආයෙත් වාඩි වුනා 

"මගේ ගෙදර තියෙන ලැප් එකේ පාස්වර්ඩ් එක මාරු කරන්න අමතක වුනා බං.සජිනි ඒක දැනගෙන"

"මොකක්ද පාස්වර්ඩ් එක?"

"නදිනි"

"හෙනම ගහපන්....ඔහොම පාස්වර්ඩ් එකක් දාන් ඉන්න උබට පිස්සුද ගොන් අලියෝ"

"අමතක වුනා බං මාරු කරන්න" සහන් කිව්වේ පසුතැවිල්ලෙන්

"හරි දැන් සජිනි මොකද කිව්වේ"

"මුකුත් නෑ"

"ඒ කියන්නේ?උබ කොහොමද දැනගත්තේ එයා දන්නවා කියලා"

"උදේ නදිනිට ලැප් එක දුන්නා මේල් එකක් දාන්න කියලා.එයා පාස්වර්ඩ් අහද්දි සජිනි කිව්වේ පාස්වර්ඩ් එක"

"හරිනේ ඉතින් හරිනේ..උබට ඕකනේ කරගන්න ඕනේ වුනේ.මං තොට කිව්වා ඔය නදිනි ගෑනිව ගෙදර නවත්තගන්න කොටම ඕක ප්‍රශ්නයක් වෙනවා කියලා.කෝ ඇහුවද? හොද වැඩේ උබට.සාදු සාදු" විහග කිව්වේ ඇත්තටම සහන් එක්ක තරහෙන්.ඒකට සහන් මුකුත් නොකිව්වේ වැරැද්දක් කියලා තේරෙන නිසා 

"හරි දැන් ලැප් එකේ මොනවද තිබ්බේ"

"අපේ ෆොටෝස් එහෙම පිරිලා බං.වීඩියෝ රෙකොර්ඩින් එහෙමත් තිබ්බා.ඒවත් දැකලද කියලයි මං හිතන්නේ"

"මොකක් කිව්වා? ඈ  බං වහු පැටියෝ ඔව්වා උබ තියන් හිටියේ කටුගෙට යවන්නද? "

"ඒ ලැප් එක කාලෙකින් දැම්මේ නෑ බං.ඒවා අයින් කරන්නවත් මට මතකයක් වුනේ නෑ" සහන් කිව්වේ බිම බලාගෙන 

"උබලා ඉතින් අපි කියන දෙයක් අහන් නෑනේ.අපට රැව්ල නෑනේ" විහග ඒපාර කිව්වේ ටිකක් සන්සුන් වෙලා 

"දැන් මට මොකක් කරන්නද උබ කියන්නේ?"

"දැන්වත් නදිනිව යවපන් ගෙදරින්.තාම පරක්කු නෑ උබ"

"කොහොමද බං එහෙම කරන්නේ? එයා ප්‍රෙග්නන්ට් නේ"

"ඉතින් ප්‍රෙග්නන්ට් ගෑනු නවත්තන් බලාගන්න උබලගේ ගෙදර මාතෘ සායනයක්ද?"

"එහෙම නෙවෙයි බං.මට කරන්න දෙයක් කියපන්කෝ උබත් මටම කෑගහන්නේ" සහන් කිව්වේ අත් දෙකත් ඔලුවේ ගහගෙන.

"කෑගහන්න නෙවෙයි වටින්නේ උබට" විහග ටිකක් එහෙම්ම බලන් හිටියා.සහන්ගෙන් උත්තරයක් නැති තැන විහග ආයෙත් කතා කරා 

"පුලුවන් නම් ගිහින් ඕක සජිනිට තේරුම් කරලා දීපන්.එච්චරයි දැන් කරන්න පුලුවන්"

"අනේ මන්දා බං.හෙට උදේ අක්කලත් එනවා අපේ ගෙදර" 

"අක්කා කිව්වේ අර රට හිටපු අක්කද?"

"ඔව් කාලෙකින් මේ එන්නේ.මං එක්කගෙන එන්න යන්න ඕනේ" 

"එතකොට නදිනි? දැන් උබ කියන්න එපා මෙතන අක්කා එනකොටත් නදිනි ගෙදර ඉන්නවා කියලා නම්"

"නෑ නෑ අක්කලා යනකම් එයා ලග ගෙදරකට යනවා කිව්වා.අපෝ බං අපේ අක්කා එක්ක ලේසි නෑ.අම්මා හොදයි තව.සජිනිට මොනවා කියාවිද කියලා මං මේ බයේ ඉන්නේ" සහන් කිව්වේ ඇත්තටම බය වෙලා වගේ 

"අනේ හොදයි උබ එහෙම බය වෙලාවත් හැදෙනවා නම්" විහග එහෙම කියද්දිම විහගගේ දුරකථනය නාද වුනා.ඒකට උත්තර දීපු විහග ආයෙත් සහන් දිහා බැලුවා.

"මං දැන් යන්න ඕනේ කොල්ලෝ.උබ අදම ඕක සජිනි එක්ක කතා කරලා විසද ගනින්.ගෑනු හිත් කියවන්න බෑ පුතේ..මේ ටිකටත් මොනවා හිතලද දන්නේ නෑ" විහග ගියේ එහෙම කියාගෙන 

විහග ගියාට පස්සේ සහන් ආයෙත් වැඩ පටන් ගත්තේ හිටියට වඩා හිත සැහැල්ලුවෙන්.ඒත් ගෙදර ගියත් සජිනිට මොනවා කියන්නද කියලා සහන් සෑහෙන කල්පනා කරා. 

කොච්චර කලින් ගෙදර යන්න හිතන් හිටියත් එදත් සහන් ගෙදර යනකොට පරක්කු වුනේ පහුවදාත් නිවාඩු නිසා.අක්කලා කටුනායකට එනවා කියලා තිබ්බෙම උදේ 8ට නිසා සහන් එදා දවසම නිවාඩුවක් ගත්තා.

සහන් ගෙදර යද්දි සජිනි ටීවී එක දාගෙන වෙනදා වගේම සාලෙට වෙලා හිටියා.සජිනිව දැකපු සහන් හිනා වෙන්න උත්සහ කරත් සජිනි හිනා වුනේ නෑ.සහන්ව දැකපු සජිනි නැගිටලා ඇතුලට ගියේ කෑම ලෑස්ති කරන්න.මෙච්චර පරක්කු වුන දවස් වලට සහන් ආපු ගමන් කනවා කියලා සජිනි අත්දැකීමෙන්ම දැනගෙන හිටියා.

නදිනි මේසෙන් වාඩි වෙලා පොතක් කියව කියව හිටියේ.සහන්ව දැකපු නදිනි හිනා වුනා.සහන්ට සැනසීමක් දැනුනේ අඩු ගානේ නදිනිවත් ඉන්නවනේ කියලා හිතලා.සහන් නදිනි ලගට ගියේ මේල් එක දැම්මද කියලා දැනගන්න 

"දැම්මද මේල් එක?"

"ඔව්..ඔයා කිව්වද?"

"කිව්වා..ලබන සතියේ ඉන්ටර්වීව් එකට දවසක් දාන්නම් කිව්වා"

"ශා ශෝක්නේ" නදිනි එහෙම කියද්දිම තමයි සජිනි බත් බෙදපු ලොකු දීසියකුත් අරගෙන එතනට ආවේ 

"මං ගෙන්නද සජිනි" නදිනි අහද්දි සජිනි එයා දිහා බලලා හිනා වුනා 

'සහන්ගේ ඒවට නදිනි මොනවා කරන්නද? අඩු ගානේ එයා එයාගේ මහත්තයට ආදරෙයි' සජිනි එහෙමයි හිතුවේ 

"හා නදිනි..කුස්සියේ බෙදලා ඇත්තේ" සජිනි කතා කරන දිහා ටිකක් බලන් හිටපු සහන් ඇතුලට ගියා.සජිනි තමන්ව නොසලකලා අරිනවා කියලා මේ දැනෙන හැගීමට සහන් කැමති වුනේ නෑ.අද කොහොම හරි මේක කතා කරනවමයි කියලා සහන් හිතාගත්තා.

රෑ කෑම කාලා සහන් කාමරේට ආවේ  සජිනි කුස්සිය අස් කරලා නාලා එහෙම එනකම්.කාමරේ වටේ දෙපාරක් විතර ඇවිදපු සහන් නැවතුනේ කණ්නාඩිය ඉස්සරහ.

"බය වෙන්න දෙයක් නෑ..සජිනි තේරුම් ගනිවි.එයා උබව සැක කරන එකක් නෑ"සහන් කිව්වේ කණ්නාඩියෙන් පේන එයාගෙම ප්‍රතිබිම්බෙට.සහන් ආයෙත් ටිකක් වෙලා බලන් හිටියා 

"කොහොම කියන්නද දෙයියනේ මේක" සහන් ආයෙත් කාමරේ වටේ ඇවිදින්න ගත්තේ හිතේ නොසන්සුන්කම නැති කරගන්න.එක පාරටම සහන් නැවතුනා . 

'මේ නිකන් කෙල්ලෙක්ට ආදරෙයි කියන්න වගේනේ මං බය වෙන්නෙ.බය වෙන්න දෙයක් නෑ.නිකන් කියන්නයි තියෙන්නේ මට පාස්වර්ඩ් වෙනස් කරන්න අමතක වුනා කියලා.මේ සහන් එහෙම බය වෙන්නේ මොකටද?' එහෙම හිතනකොට සහන්ට ලාවට හිනාවකුත් ගියා.

එතකොටම ඇහුනු සද්දයක් නිසා හැරිලා බලපු සහන් දැක්කේ කාමරේට ඇතුල් වෙන සජිනිව.සජිනි එහෙම්ම ගියේ නාන කාමරේට.

'බය වෙන්න එපා පුතේ..බය වෙන්න එපා..නිකන් කියන්නයි තියෙන්නේ.." සහන් ආයෙමත් තමන්ටම කියාගත්තා 

'ඒ වුනාට එයා හිතුවොත් මං තාමත් නදිනිට ආදරෙයි කියලා.ඒකයි නදිනිව එක්කගෙන ආවෙත් කියලා' ඒ සිතුවිල්ලට සහන් එතනම ගල් වුනා 

'නෑ..මං දැන් එහෙම හිතන් නෑනේ නදිනි ගැන.එහෙනම් මොකද මේ..ඇයි මං මෙච්චර සජිනි ගැන කරදර වෙන්නේ?'  සහන් හිටියේ තමන්ට තමන්වම තේරුම් ගන්න බැරි තත්වෙක 

මේ අතරේ සජිනි නානකාමරේ ඉදන් කල්පනා කරේ සහන් ගැන.

'එයාට නම් ගානක්වත් නැද්ද කොහෙද? දැනුත් හිටියේ කාමරේ මැද්දේ හිටගෙන තනියෙන් හිනා වෙවි'

'එයාට ගානක් වෙන්න දේකුත් නෑනේ..එයා ආදරේ නදිනිටනේ.මමනේ මේ පිස්සු හිතාගෙන හිටියේ.ටිකක් ලං වෙනකොට මාත් එක එක විකාර හිතුවා.එයාට ඒවා ගැන ගානක්වත් නැතුව ඇති' එහෙම හිතනකොට සජිනිගේ ඇස් වලට කදුලු පිරුනේ එයා නොදැනුවත්වමයි 

නිදාගන්න ලෑස්ති වෙලා සජිනි කාමරේට එනකොටත් සහන් හිටියේ කාමරේ පුටුවක වාඩි වෙලා.සජිනි සහන් දිහා බලන්නෙවත් නැතුව නිදාගන්න හිතාගෙන ඇදේ ඇල වුනා.සහන් ඇවිත් ඇදේ අනිත් පැත්තෙන් වාඩි වුනේ සජිනි එක්ක මේක කතා කරන්න හිතාගෙන 

"සජිනි..." සහන් කතා කරත් සජිනිගෙන් උත්තරක් තිබ්බේ නෑ.ඒ නිසා සහන් ආයෙත් කතා කරා 

"සජිනි මේ...ඒ ලැප් එක ඇත්තටම මං ගොඩක් කාලෙකින් දාලා නෑ .මට ඇත්තටම අමතකත් වෙලා තිබ්බේ" සහන් අමාරුවෙන් කියාගත්තා.ඒත් සජිනිගෙන් සද්දයක් තිබ්බේ නෑ 

'නින්ද ගිහින්වත්ද?' සහන්ට හිතුනා 

"සජිනි....නිදිද?"

"නෑ..."සජිනි උත්තර දුන්නේ ඇහෙන නෑහෙන හඩින් 

"මං මේ කිව්වේ සජිනි..." සහන් ආයෙත් කතාව පටන් ගන්න හැදුවත් කතාව නැවතුනේ සජිනි කතා කරපු නිසා

"මට ඇහුනා..ලයිට් එක නිමනවද? නිදිමතයි " කිසිම හැගීමක් නැතුව සජිනි ඒ කියපු කතාවට සහන්ට දැනුනේ පුදුමයක්.

ඒත් මුකුත් නොකියම සහන් ගිහින් ලයිට් එක නිමලා ඇවිත් ඇදෙන් ඇලවුනා 

'මේක මේ පාස්වර්ඩ් ගැන කතාවක් නෙවෙයි සහන්.ප්‍රශ්නේ ඔයාගේ හිතේ ඉන්න කවුද කියන එක.ඔයා මට ආදරේ නැත්තම් ඈත් වෙලා ඉන්න මගෙන්.මට බලාපොරොත්තු දෙන්න එපා.හිත රිදෙනවා සහන්.පුදුම විදියට රිදෙනවා.මේ පපුව ගැලවෙන්න තරම් රිදෙන්න ගන්නවා.මට හිතෙන්නේ වෙලාවකට මං මැරේවි කියලා' සජිනි හිතුවේ ඇස් වලින් නොනවත්වා ගලන කදුලු නවත්තගන්න උත්සහ කරන ගමන්.

********************************************************************************
දවස් දෙකක්ම නැති නිසා ඔන්න මුකුත් බය හිතෙන තැනකින් ඉවර කරේ නෑ..

සදුදා හම්බෙමු...

ආදරෙන් ඉන්න 💖

Thursday, June 28, 2018

ආදරණීය නපුරා - තිස් පස් වන කොටස


දොරේ සද්දෙට සහන් ගිහින් දොර ඇරියේ මේ රෑ කවුද කියලා හිත හිත.දොර ලග හිටියේ අවුරුදු 15ක් විතර වෙච්ච පිරිමි ලමයෙක්.

"මහත්තයා අපේ අම්මා මේ භාජන ටික සජිනි නෝනට දෙන්න කිව්වා" ඒ පිරිමි ලමයා කිව්වේ හොදට හෝදලා පිරිසිදු කරපු භාජන ටිකකුත් පෙන්නලා.සහන් හිනා වෙලා භාජන ගත්තේ මුකුත්ම අහන්නේ නැතුව.සජිනි මොනවා හරි දෙන්න ඇති කියලා සහන්ට හිතුනා

"මහත්තයා තව අම්මා කියන්න කිව්වා මේ වෙලාවේ කෑම දිපු එකට නෝනට ගොඩක් පින් කියලා" ඒ කතාවට නම් සහන් ටිකක් ගැස්සුනා.

"මේ වෙලාවේ මොනවද දීපූ කෑම" සහන් ඇහුවේ ඒ කුතුහලේ නිසාමයි 

"නෝනා අපට බුරියානි දුන්නනේ මහත්තයා" ඒ කතාවට සහන්ට දැනුනේ කවුරු හරි ඔලුවට පොල්ලකින් ගැහුවා වගේ හැගීමක් 

"බුරියානි දුන්නා?? කොයි වෙලාවේද?"

"මේ දැන් ටිකකට කලින් මහත්තයා.අම්මා වැඩ ඉවර වෙලා එනකොට අරන් ආවේ"

"බුරියානි විතරයිද?" සහන් ඇහුවේ විස්තර දැනගන්න හිතාගෙන 

"නෑ මහත්තයා.පැණි රස ජෙලි වගේ ජාතියකුත් තිබුනා.බිත්තරත් තිබ්බා.එක එක එවා ගොඩක් තිබ්බා මහත්තයා."

"අහ්...ඒකත් එහෙමද?"සහන් ඇහුවේ කල්පනා කර කර 

'එහෙනම් සජිනි රෑට බුරියානි හදලද?  කන්නෙත් නැතුවද මේ ඒපාර නිදාගන්න ගිහින් තියෙන්නේ?' සහන්ට ප්‍රශ්න ගොඩයි 

"මහත්තයා මං යන්නද? " ඒ කල්පනාව බිද වැටුනේ ඒ කොල්ලගේ කටහඩට 

"හා හරි හරි මං නෝනට කියන්නම්කෝ" සහන් එහෙම කියන පරක්කුවට කොල්ල කරුවලේම දුවලා ගියා.

භාජන ටික අරන් කුස්සියට ගියපු සහන් වතුර එකක් රත් වෙන්න තිබ්බා.ඒ තියලා සහන් ගියේ එයාලගේ කාමරේට.ඇදේ සජිනි නිදාගෙන ඉන්න තැනින් වාඩි වුන සහන් සජිනිගේ ඔලුව උඩින් අතක් තිබ්බා.සජිනිගේ කම්මුල් වල කදුලු පාරවල් එහෙම්ම වැදිලා තිබ්බා 

'පව්' සහන්ට හිතුනා 

"සජිනි " සහන් සජිනිට කතා කරාට සජිනිගේ කිසි ප්‍රතිචාරයක් තිබ්බේ නෑ 

"සජිනි..." සහන් ඒ පාර කතා කරේ සජිනිගේ උරහිසත් හොල්ලලා.ඒත් උත්තරයක් තිබ්බේ නෑ

"මං දන්නවා ඔයා නිදි නෑ කියලා.බොරු කරන්නේ නැතුව නැගිටින්න සජිනි" සහන් කිව්වේ ටිකක් සැරෙන් 

ඒ පාර නම් සජිනි හෙමීට ඇස් ඇරියා.ඒත් සහන් දිහා බැලුවේ නම් නෑ 

"කෝ නැගිටින්න" සහන් කිව්වේ හරි සන්සුන් විදියට 

"ඇයි" සජිනි ඇහුවේ ඇහෙන නෑහෙන ගානට 

"කිව්වම නැගිටින්න"

'පුප්පන්න නම් හොදට පුලුවන්.කොයි වෙලේ බැලුවත් පුප්පගත්ත ගමන්.අර අම්මට මෙහෙම පුතෙක් කොහොම හම්බුනාද මන්දා' සහන්ට හිතින් බැන බැනම සජිනි නැගිටලා ඇදේම වාඩි වුනා 

"ඇයි?" 

"රෑට කෑවද?" සහන්ගේ ඒ ප්‍රශ්නෙට සජිනි අහක බලාගත්තා 

'එලියෙන් කාලා ඉවර වෙලා ඇවිත් මෙතන මං කෑවද අහනවා'

"කෑවද?" සජිනිගේ උත්තර පරක්කු වුනාම සහන්ට තරහයි 

"ඔව්" සජිනි කිව්වේ ඕනවට එපාවට 

"මොනවද කෑවේ"

"මොනවා හරි" සජිනි උත්තර දෙන්නේ අහක බලාගෙනමයි 

"මෙහෙ බලන්න" සහන් සජිනිගේ නිකටෙන් අල්ලලා එයාගේ පැත්තට හරව ගත්තා.

"දැන් කියන්න බලන්න මොනවද කෑවේ කියලා"ඒකට සජිනි මුකුත් උත්තරයක් දුන්නේ නෑ.

"සුමනට බුරියානි දුන්නද?" සහන්ගේ කතාවට සජිනි ඇස් ලොකු කරලා සහන් දිහා බැලුවේ පුදුම වෙලා 

"ඔහොම බලන්න දෙයක් නෑ.සුමනගේ පුතා අන්න භාජන ටික ගෙනත් දුන්නා" සහන් කිව්වම සජිනි බිම බලාගත්තා.

"රෑට කෑවේ නෑ නේද?" සහන් අහපු විදියට සජිනිගේ ඇස් වල කදුලු පිරුනා.කදුලු පිටට පනින එක නවත්තගන්න හැදුවත් කදුලු කම්මුල් දිගේ බේරිලා ගියා.සහන්ට ඒක පෙනේවි කියලා සජිනි බිම බලාගෙනමයි හිටියේ.බිම කිව්වට සජිනිට බලන්න තිබ්බේ එයාගෙම අත් දෙක දිහා.වෙව්ලන අත් දෙකෙ නියපොතු එකට ගැටෙද්දි සජිනි ඒ දිහාම බලන් හිටියා.

ටික වෙලාවක් සජිනි දිහා බලන් හිටපු සහන් නැගිටලා ගියේ කුස්සියට.කුස්සියට ගිහින් කිරි එකක් හදාගත්ත සහන් ආයෙමත් සජිනි ලගට ආවා.ඒ එද්දිත් සජිනි හිටියේ ඒ විදියටමයි.කිරි එක ඇද ලගින් තියපු සහන් ආයෙත් සජිනි ලගින් වාඩි වුනා.

"කිරි එක බොමු..."ඒකටත් සජිනිගෙන් සද්දයක් තිබ්බේ නෑ 

"ඇයි කතා කරන්නේ නැත්තේ? අහ්?" එහෙම කියපු සහන්, සජිනිගේ නිකටෙන් අල්ලලා උඩට ඉස්සුවා.එතකොට තමයි සහන් සජිනිගේ රතු වෙලා කදුලු පිරිලා තියෙන ඇස් දැක්කේ.සජිනිගේ මූන දැකපු සහන් ලොකු හුස්මක් හෙලුවා 

"දැන් මේ මං කෑවේ නෑ කියලද මෙච්චර අඩන්නේ" සහන් අහද්දී සජිනි ඔලුව වැනුවා 

"එහෙනම්" 

"ඔයා කන්න එනවා කිව්වනේ..." සජිනි ඒ සැරේ හෙමීට කිව්වා 

"මං දන්නේ නෑනේ ඉතින් ඔයා මෙහෙම දෙයක් කරාවි කියලා" සහන් කිව්වේ ඇත්තටම පසුතැවිල්ලෙන්.ඒකට සජිනිගෙන් උත්තරයක් නැති තැන සහන් ආයෙත් කතා කරා 

"මොනවද හැදුවේ බුරියානි විතරයිද?"

"බුරියානියි,බිත්තරයි,එලවලු චොපිසියයි,කට්ලටුයි.චිකන් හොදිත් හැදුවා" සජිනි කිව්වේ නහයත්  ඉහලට ඇද ඇද.අඩලා නිසා සජිනිට හෙම්බිරිස්සාවත් හැදිලා

"වෙන?" 

"කැරමල් පුඩින් හැදුවා" 

"මේ හොටුත් එනවා අඩලා අඩලාම" සහන් එතන මේසෙන් ටිශූ වගයක් අරන් දුන්නා.සජිනි නහය පිහදද්දී සහන් ආයෙත් කතා කරා.

"ඉතින් ඕවා තියන්න තිබ්බනේ ෆ්රිජ් එකේ දාලා.මං හෙට කනවනේ එහෙනම්"

"එහෙම තියලා රස නෑ" සජිනි ආයෙත් නහය උඩට ඇද්ද 

'හෙම්බිරිස්සාවත් හදාගෙන අඩලා අඩලා.ඔය මුකුත් නෑනේ මට කතා කරලා කිව්වා නම්"

"එතකොට ඒක සප්‍රයිස් එකක් වෙන්නේ නෑනේ" සජිනි කිව්වේ හෙමීට වුනත් සහන්ට ඒක ඇහුනා.සහන් ඒත් ඒකට මුකුත් කියන්න ගියේ නෑ.

"ආ මේක බොන්න..බඩගින්නේ නිදාගන්න හොද නෑ" සජිනිට තේ එක දීපු සහන් එතනින් නැගිටලා ඇදේ අනිත් පැත්තට ගිහින් ඇලවුනා.

හෙමීට කිරි එක බීපු සජිනි කුස්සියට ගිහින් වීදුරුව තියලා ආවා.ඇවිත් ලයිට් එකත් නිමලා ඇදේ ඇලවෙලා සජිනි ටිකක් වෙලා කරුවල දිහාම බලන් හිටියා 

"නදිනි ගොඩක් ඇදුම් ගත්තද?" සජිනි අහපු කතාවට සහන් හිනා වුනා 

"ගොඩක් ගත්තා නම් ඒකත් එකක්.ඇදුම් තෝර තෝර වටේම ඇවිද්දා.අන්තිමට බලපු ඇදුම් වලින් දහයෙන් එකක්වත් ගත්තේ නැද්ද කොහෙද?" සහන්ගේ කතාවට සජිනිගේ හිත කීරී ගැහිලා ගියා 

'මං කතා කරොත් ඔයා මාත් එක්කත් යන්න ඒවිද සහන්?' සජිනි එහෙම හිතුවත් එහෙම දෙයක් සහන්ගෙන් අහන්න තරම් හයියක් සජිනිට තිබ්බේ නෑ.

සජිනි එහෙම හිතන අතරේ සහන්ගේ හිතේ තිබ්බේ වෙච්ච දේ ගැන පසුතැවිල්ලක්

'මාත් ගොනා වගේ කිව්වා කෑවා කියලා.කොහොම හරි ටිකක් කෑවා නම් මෙහෙම වෙන්නේ නෑනේ.එයත් දැනගන්න ඕනේ මට කියන්න.මං කොහොමද දෙයියනේ ඕවා දන්නේ? කලින් ගෑනු මට උයලා දීලා තියෙන එකක්යැ' සහන් හිතුවේ කරුවලේම තමන්ට පිටුපාලා ඉන්න සජිනි දිහා බලාගෙන.

'ඒ පාර අද ලගටවත් එන්නේ නෑ...පහුගිය ටිකෙ නම් මෙතන මැරෙන්න හැදුවා මං ඈතට වුනා කියලා.සහන් මට කැමතියිද නැද්ද? මට මේවා හිතාගන්න බෑ..හැබැයි එයා තාමත් නදිනිට ආදරේ ඇති.ඒකයි එයා ඈත් වෙන්නේ ' සජිනි කල්පනා කරේ ඇස් වලින් කදුලු බේරෙද්දී

'ලගට යන්නවත් බෑ මේක නිසා.තරහ වෙලානේ ඇත්තේ.ආයේ රණ්ඩුවක්වත් වුනොත්.මගෙත් කට හොද නෑනේ.මෙහෙම නිදාගන්නවා.මේ මුකුත් නෑනේ නදිනි එක්ක ඇදුම් ගන්න යන්න එයත් ආවා නම්.මොනවා හරි අරන් දෙන්නත් තිබ්බා.මං මුකුත් අරන් දීලත් නෑනේ' සහන් කල්පනා කරේ පසුතැවිල්ලෙන්.

සජිනි ඇදේ පැත්තක හෙමීට අඩද්දී සහන් අනිත් පැත්තේ වෙච්ච දේ ගැන පසුතැවීලෙන් නින්දක්  නැතුව කල්පනා කරන්න ගත්තා.ඒත් ඒ දෙන්නටම අදහසක් තිබුනේ නෑ ඉස්සරහට මොනවා කරන්නද කියලා 

ඊලග දවස් දෙකම ගෙවුනේ නදිනිගේ රස්සාව ගැන කතා කරන්නමයි.සහන් එයාලගේ ආයතනයට කතා කරලා තිබ්බත් ආයතනයේ ඉඩ නැති නිසා නදිනිව ගන්න කැමැත්තක් දක්කවලා තිබුනේ නෑ.ඒ නිසා නදිනිගේ ඉල්ලීමට සහන් වෙන තැන් වල නදිනිට රැකියාවන් හෙව්වා.

"නදිනි...මේ මං දන්න තැන් දෙකක්.මං කියලා තියෙන්නේ.ඔයා CV දෙකක් දානවද හෙට?"  දවසක් උදේ වැඩට යන්න ලෑස්ති වුන  සහන්  නදිනිට e mail address දෙකක් ලියපු කොලයක් දුන්නේ එහෙම කියලා.

"සහන් මට ඔයාගේ ලැප් එක දෙනවද? මගේ එක ගෙනාවේ නෑනේ" නදිනි ඇහුවේ e mail address තියෙන කොලේ ගන්න ගමන් 

"අන්න මගේ කාමරේ තියෙනවා.සජිනි ගෙනත් දෙනවද?" සහන් කිව්වම සජිනි ගිහින් ලැප් එක නදිනිට ගෙනත් දුන්නා 

"බැට්‍රි ඇති මං හිතන්නේ.මං කාලෙකින් දාලා නෑ" සහන් කියද්දි නදිනි හිනා වුනා 

"ඔයාගේ මතකේ ඉතින් කොහොමත් සවුත්තුයිනේ" නදිනිගේ ඒ කතාවට සවුත්තු වුනේ සජිනිගේ හිත.

සැරින් සැරේට මතු වෙන නදිනිගෙයි සහන්ගෙයි යාලුකම ගැන කියවෙන මේ  වගේ කතා වලින් සජිනිගේ හිත පෑරිලා තිබ්බේ.කොච්චර හිනා වෙලා ඉන්න හැදුවත් හිනා වෙන්න බැරි තරමටම සජිනි දුකෙන් හිටියේ.සජිනි දුකෙන් කියලා සහන්ට තේරුනත් ඒකට මොනවා කරන්නද කියලා එයාට තේරුමක් තිබ්බේ නෑ.

"එහෙනම් ඕක එවලා තියන්න.මං යනවා" එහෙම කියපු සහන් එළියට යන්න හදනකොටම නදිනි ආයෙත් කතා කරා.

"සහන් මේකේ පාස්වර්ඩ් එක මොකක්ද?" සහන්ටත් එක පාරට මතක් වුනේ නෑ.

"ඉන්න මගේ ෆෝන් එකේ සේව් කරලා තියෙන්නේ" සහන් ෆෝන් එක ගත්තේ පාස්වර්ඩ් එක බලන්න හිතාගෙන.කාලෙකින් දාපු නැති නිසා සහන්ට පාස්වර්ඩ් මතක තිබුනේ නෑ.කොහොමත් ඔය වගේ පාස්වර්ඩ් සහන්ට වැඩිය මතක හිටින්නේ නෑ.

ෆෝන් එක අරන් බලපු සහන් ටිකක් වෙලා එහෙම්ම හිටියා.

"මොකක්ද පාස්වර්ඩ් එක? ඕකේ නැද්ද?" නදිනි ආයෙත් ඇහුවේ සහන්ගේ සද්දයක් නැති නිසා 

"අහ් මේ..පාස්වර්ඩ් එක මේ..." සහන් කියාගන්න බැරුව ගොත ගැහුවා.

"නදිනි කියලා දාලා බලන්න.සිම්පල් ලෙටර්ස්" මෙච්චර වෙලා මේක බලන් හිටපු සජිනි කිව්වේ ඇහෙන නෑහෙන හඩකින්.

නදිනියි සහනුයි දෙන්නම බය වෙලා බලන් ඉන්න අතරේ සජිනි හැරිලා කාමරේට ගියා.

සහන් සජිනිගේ පස්සෙන් යන්න හදලත් ආයේ එළියට ගියේ නදිනි දිහාවත් නොබලා.

"ෂිකේ,මට ඒ පාස්වර්ඩ් එක වෙනස් කරන්න මතක් වුනේ නෑනේ...සජිනි මොනවා හිතනවද දන්නේ නෑ" සහන් තමන්ට කියාගත්තේ පසුතැවිල්ලෙන් 

*********************************************************************************

හරි ලමයි අද පොඩි දේවල් වගයක් කියන්න තියෙනවා.

මුලින්ම කියන්න ඕනේ මේ කතාවේ අවසානයට තමයි අපි කිට්ටු වෙන්නේ.ඉතින් කන්දක් නගින්නම ඕනනේ පල්ලමක් හම්බෙන්න.ඒ නිසා මේ ටිකේ ටිකක් දුක හිතුනත් ඉවසන් ඉමු නේද? 😅 විශේෂ දැනුම් දීම මට ඉන්බොක්ස් හරහා මරණ තර්ජනේ කරන අයට.එයාලට බය වෙලාමයි මේක දැම්මේ.

ඊලගට මට මේ සතිඅන්තය ගොඩාක් කාර්‍යබහුල සතිඅන්තයක්.දේශන විභාග එක්ක මට හුස්ම ගන්නවත් වෙලාවක් නෑ.ඉතින් හෙට කතාව ගෙනාවට පස්සේ ආයෙත් ඔයාලව හම්බ වෙන්නේ සදුදා 😇

මේ පණිවිඩය මගේ බ්ලොග් එක බලන අයට.මගේ බ්ලොග් එකට අමතරව මගේ කතාව මුහුණු පොතේ සිහින පොත් ගුල ගෘප් එකෙත් තියෙනවා.ඒකෙන් බලන්නත් පුලුවන්.

හරි එහෙනම් හෙට හම්බෙමු...

ආදරෙන් ඉන්න 💖

Wednesday, June 27, 2018

ආදරණීය නපුරා - තිස් හතර වන කොටස



පහුවදා ඉරිදා නිසා හවස්  වෙනකම්ම  සහන් කරේ ටෙස්ට් මැච් එකක් බලපු එක.නදිනිත් ක්‍රිකට් වලට ආස නිසා එයත් සහන් එක්ක ඉදගෙන මැච් එක බැලුවා.සජිනි නම් ඒ මැච් බැලිල්ලට කැමැත්තක් වුනේ නැති නිසා එයාගේ පාඩුවේ පොතක් කියෙව්වා.

"මට නම් මේ ඉන්දියන්කාරයෝ පේන්න බෑ..." නදිනිගේ නෝක්කාඩුවට සජිනියි සහනුයි දෙන්නම හිනා වුනා

"ඉන්දියන්කාරයෝ අපට වඩා හොදයි.දැන්වත් ඇත්ත පිළිගන්න"

"මෙයා බලන්නකෝ සජිනි..ඔයා ලංකාව පැත්තෙද? ඉන්දියාව පැත්තෙද?"

"අපට එහෙම පැත්තක් නෑ....අපි හරි උපේක්ශාවෙන් තමයි තරගයක් බලන්නේ" සහන්ගේ කතාවට නදිනියි සජිනියි හිනා වුනේ බඩවල් අල්ලගෙන 

"මාර උපේක්ශාව මෙයාගේ...උපේක්ශාව කියලා ලියාගන්නවත් දන්නෙ නැතුව ඇති" නදිනිගේ කතාවට සජිනි ආයෙත් හිනා වෙන්න ගත්තා.

"මේ ඕවට එන්න එපා හරිද? මට සිංහල A එකක් තිබ්බා O/L වලට" සහන් කිව්වේ කමිසේ කරත් උස්සලා 

"ඉතින් අපට නෑ කියලද හිතුවේ.මේ බලන්නකෝ සජිනි මෙයාගේ කතාව"

"ඔයාලගේ රණ්ඩු වලට මාව අල්ලගන්න එපා...බොන්න මොනවා හරි හදන්නද?" සජිනි ඇහුවේ පුටුවෙන් නැගිටින ගමන්.

"හා යමු මාත් එන්නම්.මෙයා එක්ක මේව බලනවට වඩා හොදයි නිදාගන්නවා"

"ඉතින් නිදාගන්නවකෝ ගිහින්..සජිනි මට තේ එකක්" සහන් කෑගැහුවේ සජිනිලා කුස්සියට යන අතරේ 

"ඔයා දන්නවද සජිනි,සහන්ට O/L සිංහල විතරයි A තියෙන්නේ.අනිත් ඔක්කොම B" එහෙම කියපු නදිනි හිනා වෙන්න ගත්තා 

"නෑ..." සජිනි ඒ ගමන් වතුර එක රත් වෙන්න තිබ්බේ තේ හදන්න 

"ඔව් අනේ...එයා ඉතින් ඔහොම සිංහල වචනයක් ගැන කියපු ගමන් කියන්නේ එයාගේ සිංහල A එක ගැන"

"ඉතින් සිංහල A තියෙන එකම ලමයා එයා නෙවෙයිනේ" සජිනි ඇහුවේ පුදුමෙන් 

"එයාලගේ යාලුවො සෙට් එකේ A තිබිලා තියෙන්නේ මෙයාට විතරයි" නදිනි ආයෙත් හිනා වෙන්න ගත්තා 

"පව් අනේ..." සජිනි හිනා වෙවීම බිස්කට් පැකට් එකක් එලියට ගත්තා.

"කනවද?" සජිනි බිස්කට් එක දීලා ඇහුවට නදිනි ගත්තේ නෑ 

"එපා අනේ..ඕවට ආස නෑ.."

"ඉතින් ආස දෙයක් කියන්න.හදලා දෙන්නම්" සජිනි ඇහුවේ මේ කාලෙට නදිනි කන්න ආස ඒවත් ඇතිනේ කියලා හිතලා.

"මං පස්සේ කියන්නම්කෝ..මේ සජිනි මං තව ටිකකින් පොඩි ගමනක් යන්න කියලා..ඔයත් එනවද?

"ඒ කොහෙද?"

"ඇදුම් ටිකක් ගන්න.මං මහත් වෙලාද කොහෙද මේ ඇදුම් ටිකක් හිරයි"

"ඔව් ඔයා ඉස්සරට වඩා මහත් වෙලා තමයි" 

"ඒකනේ අනේ...සහන් කිව්වා මාව එක්කන් යන්නම් කියලා.ඔයත් එනවද" නදිනි කියද්දී සජිනිත් ඔලුව වැනුවේ හා කියලා.ඒත් එක පාරට ආපු අදහසකට සජිනි ආයෙත් නදිනි දිහා බැලුවා.

"බෑ නදිනි...තිළිණි අක්කගේ වැඩකට එන්න කිව්වා.අර ඉස්සරහ ගෙදර අක්කා.මං කිව්වේ ඔයාට.ඔයාලා ගිහින් එන්න"

"අයියෝ එහෙමද? එහෙනම් කමක් නෑ"

"නදිනි මේ තේ එක දෙනවද සහන්ට? මට කෝල් එකක් ගන්න ඕනේ අම්මට"  නදිනිට තේ එක දීපු සජිනි කෙලින්ම ගියේ කාමරේට.ෆෝන් එක හොයාගත්ත සජිනි කෝල් කරේ සහන්ගේ අම්මට 

"හලෝ"

"හෙලෝ අම්මා"

"කොහොමද පුතේ? මං මේ කතා කරන්නත් හිටියේ"

"ඇයි අම්මා හදිස්සියක්ද?"

"නෑ නෑ සහන්ගේ අක්කලා ඔන්න අනිද්දා  ලංකාවට එනවලු"

"ආ හරි ඉක්මනට එනවා නේද? "

"ඒකනේ..එනවා එනවා කිව්වට මෙච්චර ඉක්මනට ඒවි කියලා මාත් හිතුවේ නෑ .ඒකත් බලන්නකෝ අද උදේ තමයි කිව්වේ.ඒ ලමයා ඔහොම්මයි.අන්තිම මොහොතේ කියන්නේ"

"අක්කට අමතක වෙන්න ඇති අම්මේ,පොඩි එක්කෙනත් එක්ක තනියෙන්නෙ අක්කා ඔක්කොම කරන්නේ.අයියටත් වැඩ ඇතිනේ"

"ඔව් කරලා දෙන්නවත් අපේ කවුරුවත් එහේ නෑනේ.දුවත් එයාලව දැකලම නෑ නේද? "

"ඔව් වෙඩින්ග් එකට හිටියෙත් නෑනේ.ෆොටෝ විතරයි දැකලා තියෙන්නේ"

"ඒකනේ...මේ සැරේ ආවම මාස 2ක් විතර ඉන්නවලූ.එතකොට හොදට දැන අදුනගන්න බැරියැ"

"ඔව් ඒක තමයි"සජිනි ඒ අතරේ හිතුවේ කොහොමද මේක අම්මාගෙන් අහන්නේ කියලා

"දුව මේ වෙලාවේ මේ කතා කරේ මොකක් හරි උවමනාවක්ද?"

"මේ අම්මේ..මේකයි මේ පොඩි දෙයක් දැනගන්න කියලා"

"ඒ මොකක්ද?"

"සහන් වැඩියෙන්ම කන්න කැමති මොනවද අම්මේ? මං සමහර ඒවා නම් දන්නවා.ඒත් අම්මා මට වඩා දන්නවා ඇතිනේ" සජිනි කියද්දී අම්මා හිනා වුනා

"මොකද මේ ඒක පාරට? උපන්දිනෙත් තාම නෑනේ අපෙ එක්කෙනාගේ"

"නෑ නෑ එහෙම නෙවෙයි අම්මා.අද ඉරිදත්නේ .පොඩ්ඩක් හොදට කෑම හදන්න හිතුආ .ඒකයි"

"අහ් මං ඒත් හිතුවා....මේ...හරි හරි ඒකෙන් වැඩක් නෑ.සහන් වැඩිපුර කැමති ගමේ කෑමට.පොළොස්,කොස්,දෙල් වගේ ඒවට.ඒත් මේ වෙලාවේ හොයාගන්න බැරුව ඇති නේද?"

"අනේ ඒකනේ අම්මේ..මේ වෙලාවේ කොහොමද හොයාගන්නේ"

"එහෙනම් මං කියන්නද වැඩක්"

"මොකක්ද අම්මේ"

"ඔයා දන්නවද බුරියානි හදන්න"

"හදලා නම් නෑ හැබැයි ඉස්සර අපේ අම්මා හදනකොට අම්මට උදව් කරලා තියෙනවා.රෙසපි එකක් බලාගත්තා නම් හදන්න පුලුවන් "

"හරි එහෙනම් ඔයා බුරියානි එකක් හදන්න.බිත්තරත් බැදලා.සහන් හරි කැමතියි බුරියානි කන්න.හොද සැරට චිකන් හොද්දකුත් හදන්න"

"චිලි පේස්ට් එකක් වගේ හොදයිද අම්මා? වෙජිටබල් චොපිසියකුත් එක්ක "

"ඒවා නම් ඕනෙත් නෑ දරුවෝ බුරියානි වලට.ඔයාට ඕනේ නම් හදන්නකෝ"

"අම්මා ඩෙසර්ට් වලට මොනවද හොද?"

"බිස්කට් පුඩිමක් හරි කැරමල් එකක් හරි හදන්න.ඉක්මනට හදාගන්නත් පුලුවන්නේ"

"හරි අම්මා...මං එහෙම හදන්නම්කෝ.අම්මා සහන්ට කියන්න එපා හොදේ"

"අනේ නෑ පුතේ මං ඕවා කියනවද?.පුතේ සහන්ට කියනවද අනිද්දට අක්කලා ගන්න යන්න කියලා.තාත්තට කතා කරන්න කියන්නකෝ"

"හා හරි අම්මේ මං සහන්ට කියන්නම්" සජිනි එහෙම කියද්දිම පිටිපස්සෙන් ඇහුනේ සහන්ගේ කටහඩ

"මොකක්ද මට කියන්නම් කිව්වේ"

"අහ් මේ අම්මා ඉන්නේ කෝල් එකේ..කතා කරන්න"

"ඔයාගේ අම්මද මගේ අම්මද?" සහන් ෆොන් එක ගන්නේ නැතුව රහසින් ඇහුවේ සජිනි අම්මලා දෙන්නටම කතා කරන්නේ එකම විදියට නිසා

"ඔයාගේ අම්මා අනේ.." එහෙම කියලා සහන්ට රවලා ෆෝන් එක දීපු සජිනි එලියට යන්න ලෑස්ති වුනේ  කෑම හදන්න ඕනේ බඩු ගන්න හිතාගෙන.සජිනි ලෑස්ති වෙලා සාලෙට එනකොටම තමයි නදිනිත් ලෑස්ති වෙලා එලියට ආවේ

"අහ් ඔයා එනවද ඒ පාර"නදිනි ඇහුවේ සජිනිත් එලියට යන්න ලෑස්ති වෙලා නිසා

"නෑ නෑ නදිනි...මං මේ බඩු වගයක් ගන්න යන්න කියලා.ගෙදර බඩුත් ඉවර වේගෙන යන්නේ"

"අපි එක්කම යමු.මං දාන්නම් ෆුඩ් සිටි එක ලගින්" එහෙම කිව්වේ ලෑස්ති වෙලා එතනට ආපු සහන්

"හා යමු එහෙනම්" සජිනි එහෙම කියද්දි සහන් බැලුවේ නදිනි දිහා

"ඔයා ලෑස්ති වුනාද?"

"ඔව් මං රෙඩි"

"පුදුමයි.ඔයාට ඉස්සර පැයක් විතර යනවනේ ලෑස්ති වෙන්න"

"අනේ...එහෙම නෑ ඔයා පැයක් කලින් ලෑස්ති වුනාට මං මොනා කරන්නද?" නදිනිත් හිනා වෙවී කියනකොට පලවෙනි සැරේට සජිනිට හිතෙන්න ගත්තා සහනුයි නදිනියි එකට යවන එක හොද නෑ කියලා.ඒත් දැන් අම්මටත් කියලා ලෑස්ති වුන එකේ මේකම කරනවා කියලයි සජිනි හිතාගත්තේ.

"මේ ඔන්න කාලා එහෙම එන්නෙපා එළියෙන්.මං උයනවා හොදේ" සජිනි කාර් එකට නැගලා සහන්ට කිට්ටු වෙලා කිව්වේ  සහන් එලියෙන්  කාලා ඒවි කියලා. එහෙම වුනොත් මේ කරන ඔක්කොගෙන්ම වැඩක් නැති වෙනවා.

සජිනිගේ කතාවට සහන් හිනා වුනා

"නෑ නෑ කොහෙන්වත් කන්නේ නෑ.ගෙදර ඇවිත් ඔයාගේ කෑම එකමයි කන්නේ"

සජිනිව ෆුඩ් සිටි එකෙන් දාලා ගියාට පස්සේ සජිනි හොයාගත්ත බුරියානි රෙසපි එකේ හැටියට ඕනේ බඩු අරන්  ඉවර වෙනකොටත් 5ට කිට්ටුයි.

ඉක්මනටම ආපහු ගියපු සජිනි උයන්න ගත්තේ සහන්ලා එන්න කලින් උයලා ඉවර කරන්න හිතාගෙන.

සහන් රෑ කියපු කතාවට සජිනිගේ හිත අවුල් වෙලා තිබ්බේ.

'දෙන්නා එක්ක එලියට යන්න කතා කරාම නදිනිවත් එක්කගෙන ආපු ගෑනිනේ' සහන්ගේ ඒ කතාව සජිනිට දැනුත් ඇහෙනවා වගේ.

'ඒ කියන්නේ සහන් ඒ ගමන නදිනිව එක්කගෙන යන්න හිටියේ නැද්ද?' සජිනි කීප සැරයක්ම තමන්ගෙම අහගත්තා.සහන් කොණ්ඩ කටු අරන් දීපු එක ගැනත් සජිනිගේ හිතේ තිබ්බේ සතුටක්.ඒ වෙනුවෙන් සහන්ට මොනවා හරි කරලා දෙන්න ඕනේ කියලා තමයි මේ සජිනි මෙහෙම සහන් කැමති කෑම හදන්න ගත්තේ.

 කලින් හදලත් නැති නිසා  පැය දෙකක් විතර මහන්සි වෙලා සජිනි බුරියානි එකයි එළවළු චොප්සියකුයි හදලා බිත්තරත් බැදලා තිබ්බා.ඔක්කොම ලස්සනට මේසෙට තියලා සරසපු සජිනි බලන් හිටියේ සහන්ලා එනකම්.මේසේ ලග වාඩි වෙලා පැයක්ම බලන් හිටියත් සහන්ලා එන පාටක් තිබ්බේ නෑ.

සහන්ට කෝල් කරන්නත් හදලා සජිනි නිකන් හිටියේ මේ සර්ප්‍රයිස් එක අවුල් වේවි කියලා.

සහන්ලා එනකොට රෑ 9ත් පහු වෙලා.සහන් ගෙට ඇතුල් වෙනකොටම දැක්කේ ටීවී එකත් දාගෙන එතන පුටුවේ නිදාගෙන ඉන්න සජිනිව.

"සජිනිට නින්ද ගිහින් නේද?" සහන්ට පිටිපස්සෙන් බෑග් ගොඩකුත් උස්සගෙන ආපු නදිනි හොරෙන් වගේ ඇහුවේ සජිනිට ඇහැරේවි කියලා.

"හ්ම්ම්...මං එයාව ඇදට ගෙනියන්නම්"

"මං එහෙනම් නිදාගන්න යනවා සහන්,හරි නිදිමතයි"එහෙම කියලා නදිනි නිදාගන්න ගියාට පස්සේ සහන් සජිනිව උස්සලා ගන්න හැදුවේ එයාව ඇදෙන් තියන්න හිතාගෙන.

ඒත් එතකොටම සජිනිට ඇහැරුනා.සජිනි බය වෙලා බැලුවේ එයා ඉස්සරහ හිටගෙන බලන් ඉන්න සහන් දිහාව.

"ඇයි?" සජිනි ඇහුවේ නිදිමතෙන්මයි

"ඇයි මෙතන නිදි? යමු ඇදට" සහන් කියනකොට එක පාරටම සජිනිට මතක් වුනේ හදපු කෑම

"සහන්, කෑම හැදුවා.කමු" සජිනි කිව්වේ පුටුවෙන් නැගිටින ගමන්

"අනේ සජිනි කාලනේ ආවේ..." සහන් එහෙම කියනවත් එක්ක සජිනිගේ මූණ මැලවුනා.ඒක දැකපු සහන් සජිනි ලගට ආවා.

"නදිනිට බඩගිනියි කිව්වා.මටත් හරි මහන්සියි එයා එක්ක එහේ මෙහේ ඇවිදලා.ඒපාර කෑවා ඉතින්"

"අනේ චුට්ටක් කමුකෝ"

"බෑ සජිනි...බඩ හොදටම පිරිලා....මං යනවා වොශ් එකක් දාන්න" සහන් එහෙම කියලා යන්න ගිහින් ආයෙත් හැරුනා.

"ඔයා කාලද?"

"ඔව්.." සජිනි හෙමීට කිව්වා.දැන් කොහොමත් කන්න උවමනාවක් තිබ්බේ නෑ සජිනිට.සහන් කාමරේට ගිය අතරේ සජිනි ගියේ කෑම මේසේ ලගට.

පැය ගානක් තිස්සේ මහන්සි වෙලා හරි රසට ලස්සනට හදපු කැම ටික දිහා සජිනි දුකෙන් බලන් හිටියා.

'මේවා වීසී කරන්නත් බෑ' එහෙම හිතනකොට සජිනිට එක පාරට මතක් වුනේ සුමනා නැන්දව.සුමනා තමයි මේ අපාර්ට්මන්ට් වල පිරිසිදු කරන වැඩ කරන්නේ.අද හවස හම්බුන වෙලාවේ අද රෑ වෙනවා කියලා සුමනා කිව්වා කියලා සජිනිට මතකයි.සජිනි එහෙම්ම කෝල් එකක් ගත්තේ සුමනට

"හලෝ"

"සුමනා නැන්දේ මං සජිනි"

"අනේ ඇයි නෝනා මේ වෙලාවේ"

"මේ නැන්දා වැඩ ඉවරයිද?"

"දැන් තමයි නෝනේ වැඩ ඉවර වුනේ...දැන් ගිහින් උයන්නත් ඕනේ"

"අහ් නැන්දේ එහෙනම් මෙහෙට එන්නකෝ..මෙහේ කෑම තියෙනවා.මං දෙන්නම්" එහෙම කියලා ෆෝන් එක තියපු සජිනි ගියේ කෑම ටික ලෑස්ති කරන්න.ටිකකින් දොරේ බෙල් එක වැදුනේ සුමනා ආපු නිසා

"අනේ නෝනෙට පින් නෝනේ මේ කරන උදව්වට.මං එවන්නකෝ මේ බාජන ටික අපේ ලොකු කොල්ලා අතේ"

"ඒක කොයි වෙලාවේ ගන්න බැරිද? මං ලොකු අය තුන්දෙනෙක්ට ඉව්වේ.නැන්දටයි මහත්තටයි පොඩි දෙන්නටයි ඇති වේවි"

"අනේ මේ හොදටම ඇති නෝනේ.නෝනට පින්" සුමනා ගියේ සජිනිට පුළුවන් තරම් පින් දුන්නට පස්සේ.

කුස්සියට ගිහින් වතුර එකක් බීපු සජිනි ඇදට ගිහින් ඇලවුනා.

'කිව්වේ නම් ගෙදර ඇවිත් මගේ කෑමමයි කන්නේ කියලා.ඇයි සහන් ඔයා මෙහෙම වෙනස් වෙන්නේ' ඒ සිතුවිල්ලට සජිනිගේ ඇස් වල කදූලු පිරුනා.කදුලු වලක්වන්න හිතාගෙන සජිනි ඇස් වහගත්තත් ඒකෙන් වුනේ කදුලු එලියට පැනපු එක.

නාගෙන එළියට ආපු සහන් දැක්කේ ඇදේ ඇලවෙලා ඉන්න සජිනිව.ඇස් වහගෙන හිටපු නිසා සහන් හිතුවේ සජිනි නිදි ඇති කියලා.ඇදෙන් ඇලවෙන්න ගියත් වතුර තිබහක් ආපු නිසා සහන් ඇදෙන් නැගිටලා කුස්සියට ගියේ වතුර එකක් බොන්න.

එතකොටම තමයි සහන්ට ඇහුනේ කවුරුහරි දොරේ බෙල් එක ගහන සද්දේ.

*********************************************************************************

අද ගොඩක් අය කොටස් දෙකක් ඉල්ලුවා.කොටස් දෙකක් ලියාගන්න ටිකක් අමාරුයි.ඉතින් ඒ නිසා ඔන්න ඒකට හරි යන්න දිග කොටසක් ගෙනාවා

හෙට හම්බෙමු...

ආදරෙන් ඉන්න 💖

Tuesday, June 26, 2018

ආදරණීය නපුරා - තිස්තුන් වන කොටස



"කොහෙටද යන්නේ" සහන් ඇහුවේ වාහනේ පාරට දාන ගමන්.කාගෙන්වත් උත්තරයක් නැති තැන සහන් බැලුවේ සජිනි දිහා.

"කොහෙද යන්නේ?" සහන් ඒ පාර සජිනි දිහා බලන් අහනකොට සජිනි නදිනි හිටපු පිටිපස්සේ ශීට් එක පැත්තට හැරුනා 

"කොහෙටද නදිනි ඔයා යන්න කැමති" සජිනි ඒක අහනකොට සහන් ආයෙත් සජිනි දිහා බැලුවා 

'එයාගෙන් ඇහුවම කොහෙටද යන්න ඕනේ කියලා එයා නදිනිගෙන් අහනවා.මට නදිනිගෙන්ම අහන්න තිබ්බේ' සහන් කල්පනා කරා

"දැම්ම කන්න යන්නත් කලින් වැඩියිනේ" සජිනි කිව්වම නදිනි කල්පනා කරන්න ගත්තා. 

"ම්ම්ම්...විහාරමහාදේවි එකේ කාර්නිවල් එකක් තියෙනවා කියලා එෆ්බී පෝස්ට් එකක් දැක්කා .එහේ යමුද?" නදිනි ඇහුවේ ටිකක් කල්පනා කරලා

"හා යමු" සජිනිත් කිව්වේ ඒකට එකග වෙලා.සහනුත් ඒකට ඔලුව වැනුවා .

ටිකකින් විහාරමහාදේවි එක ලග වාහනේ නවත්තපු සහන් සජිනිටයි නදිනිටයි බහින්න කිව්වේ එයා වාහනේ නවත්තලා එනකම්.

"කමක් නෑ නේද මං මෙහෙට එමු කියපු එක?" නදිනි සජිනිගෙන් ඇහුවම සජිනි හිනා වුනා 

"අයියෝ ඔයා එහෙම කියපු එක හොදයි.මට නම් කිසිම අදහසක් තිබ්බේ නෑ කොහෙ යන්නද කියලා"

"ජීවක හරි ආසයි කාර්නිවල් වලට .බැන්දට පස්සේ ජීවක එක්ක මෙහේ තියෙන හැම කාර්නිවල් එකටම ආවා.දැන් ඇවිත් ඇවිත්මද කොහේ මාත් ආසයි" නදිනි කිව්වේ හිනා වෙවි 

"ජීවක අපේ වයසෙද?"

"අවූරුදු 3ක් වැඩිමල් අපට වඩා.හරි ප්‍රශ්න අනේ මුල් කාලේ.අපි දෙන්නා සම්පූර්ණ වෙනස්.මං කැමති සැර කෑම කන්න,එයා කැමතිම නෑ.එයා හරීම පිරිසිදුයි පිළිවලයි.එයාගේ පිළිවලට හැදෙන්න හරි අමාරු වුනා.ඒ විතරක් නම් බැරියෑ,එයා දවසෙම වැඩ කරලා නිවාඩු දවසේ එළියට යන්න කැමතියි.මං කැමති ගෙදර ඉන්න.මං කැමතියි නිතරම කෝල් කරනවට.ඒකට එයා කෝල් කරන්නෙම නෑ"නදිනිගේ කියවිල්ලට සජිනිට හිනා ගියා 

"එච්චරද?"

"අපෝ නෑ..පොතක් ලියන්න තරම් වෙනස්කම්"

"ඉතින් ඔයාද වෙනස් වුනේ?" සජිනි ඇහුවම නදිනි හිනා වුනා 

"අපි දෙන්නම.එයා සැර කෑමට පුරුදු වුනා.මං එයා එක්ක එළියට යන්න පුරුදු වුනා.ඒ වගේ ඉතින් අපි දෙන්නට දෙන්නා පුරුදු වුනා" නදිනි කිව්වේ ඒ හිනාවෙන්මයි.ජීවක මතක් වෙලා නදිනිගේ ඇස් වලට කදුලු පිරෙනවත් සජිනි බලාගෙනයි 

'එච්චර වෙනස්කම් තිබිලත් ඒ දෙන්නා අද සතුටෙන්.අපේ වෙනස්කම් ඇත්තෙම නැතුව අපි කොච්චර දුරින්ද ඉන්නේ' සජිනි හිතුවේ දුකෙන් 

ඒත් එක්කම සහන් ආපු නිසා එයාලා ටිකට් අරන් ඇතුළට ගියා.මහ ගොඩක් රෑ වෙලා නැති වුනත් ඒ වෙනකොටත් කාර්නිවල් එකේ සෙනග පිරිලා.

"අර අතන අච්චාරු කඩයක්.ටිකක් අරන් එන්නම් මං" නදිනි එහෙම කියලා සෙනග අස්සෙන් රිංගලා එතනට ගියේ සහන්වයි සජිනිවයි තනි කරලා.සජිනිගේ මූණේ අමුතු වෙනසක් සහන් දැක්කේ මේ වෙලාවේ. 

"ඇයි සජිනි?" සහන් ඇහුවේ ඒ නිසාමයි

"මුකුත් නෑ" සජිනි එහෙම උත්තර දුන්නත් සහන්ට මතක් වුනේ සෙනග වැඩි තැන් වලට කැමති නෑ කියලා සජිනි කියපු කතාව.

ඒත් එක්කම එතනට ආවේ අච්චාරු බෑග් එකකුත් ගත්ත නදිනි.

"ආ මෙන්න ගන්න" නදිනි අච්චාරු බෑග් එක සජිනිලට දික් කරා.සජිනි ඒක ගත්තත් සහන් නම් ඒ දිහා බැලුවේවත් නෑ 

"මේ ගෑනු ලමයි ඇයි ඔච්චර ඔය අච්චාරු ජාති වලට කැමති"සහන් ඇහුවේ නදිනියි සජිනියි ඒවා කන දිහා බලන් ඉදලා 

"මගේ නම් එහෙම ලොකු කැමැත්තක් නෑ.හම්බුනාම කනවා" සජිනි කිව්වේ නදිනිට ආයෙත් බෑග් එක දෙන ගමන් 

"මං නම් ආසයි" නදිනි කිව්වේ වෙරළු ගෙඩියක් කටේ දාගන්න ගමන් 

"හරි හරි අපි යමුද ඉස්සරහට...." සහන් ඇහුවේ එක තැන ඉන්නකොට මිනිස්සුත් ඇගේ හැපෙනවා වැඩි නිසා.

ඉස්සරහට යද්දි එක පාරටම කවුදෝ අතින් අල්ලගත්ත බවක් තේරුන සජිනි බය වෙලා බැලුවේ වික්‍රමගේ සිද්දියත් අමතක නැති නිසා 

"මම මම අල්ලගත්තේ...බය වෙන්න එපා" සහන් ලග ඉදන් කියද්දි සජිනිට සැනසිල්ලක් වගේම ලැජ්ජවකුත් දැනුනා.

"ඔහොම බෑ ඉතින්..මහත්තයාගේ අත අදුරගන්න පුලුවන් වෙන්න ඕනේ" සහන් සජිනිගේ කණට කරලා කිව්වේ කාර්නිවල් සද්දේ නිසා.ඒ කතාවට සජිනි රතු වුනා 

සෑහෙන දුරක් එක එක බඩු බල බල බයිට් ජාති කකා ඇවිදගෙන ගියත් සහන් විනාඩියකටවත් සජිනිගේ අත අතැරියේ නෑ 

"යමුද අපි දැන්" සජිනි කිව්වේ නදිනි දිහා බලලා.නොකිව්වට නදිනි හරි මහන්සියෙන් ඉන්නේ කියලා සජිනිට තේරුනා.

"හරි එහෙනම් යමු..වාහනේ ගෙන්නම් මං .කොහොමත් දැන් 8යි.කන්නත් ඕනනේ" එහෙම කියපු සහන් වාහනේ ගෙන්න ගිය අතරේ සජිනි නදිනි දිහා බැලුවා.

"ඔච්චර අච්චාරු කාලා දැන් රෑට කන්න පුලුවන්ද"

"බෑ අනේ...හිතුවේ නෑ එච්චර කැවේවි කියලා"

"පොඩ්ඩක් හරි කමු හොදේ..අන්න කාර් එක එනවා" සජිනි නදිනිගේ අතින් අල්ලගෙන කාර් එකට ගියා.

එයාලා ගියේ කොලඹ ප්‍රසිද්ද අවන්හලකට.කෑම ඇණවුම් කරලා වාඩි වෙලා ඉන්න අතරේ නදිනි වැසිකිළියට ගියා.නදිනි ගියාට පස්සේ සජිනි කල්පනාවකට වැටුනා 

"මොනවද හිතන්නේ?"  සහන් ඇහුවේ සජිනිගේ කල්පනාව නිසාමයි 

"මුකුත් නෑ"

"මුකුත් නෑ කියලා පේනවා අහස පොළව ගැට ගහන්න කල්පනා කරන විදියෙන්" සහන් කිව්වේ කටකොණකින් හිනා වෙන ගමන් 

"නෑ මං මේ හිතුවේ..." සජිනි කතාව පටන් ගන්නකොටම කෑම ගෙනාපු නිසා සජිනිගේ කතාව නැවතුනා.එත් එක්කම එතනට නදිනි ආපු නිසා කට්ටිය කෑම බෙදාගන්න ගත්තා.

"ඔයා මස් කනවද නදිනි? ඉස්සර වෙජිටේරියන් නේද?" සහන් ඇහුවේ නදිනි මස් කෑලි 3ක්ම බෙදාගන්නවා බලන් ඉදලා 

"අහ් මේ ඔව්..දැන් කනවා" නදිනි කිව්වේ සහන්ගේ ඇස් මග ඇරලා 

"නදිනි..ඔයා ප්‍රෙග්නන්ට් ද?" සජිනි එක පාරටම ඇහුවේ සහන් වගේම නදිනිත් පුදුම කරලා

"මොකක්ද?" සහන් ඇහුවේ පුදුම වෙලා 

"අහ් ඔව්.." නදිනිගේ කතාවට සහන් තවත් පුදුම වුනා 

"දැන් කොච්චර කල් ද?" සජිනි අහද්දි නදිනි හිනා වුනා.

"මාස 3 පහු වෙලා" 

"ජීවක දන්නවද?" සජිනි ඇහුවම නදිනි ඔලුව දෙපැත්තට වැනුවේ ඇස් වල කදුළු පිරෙද්දි

"ඇයි ඒ? එයා මේක දැනගන්නම ඕනනේ" සජිනි ඇහුවේ නොඉවසිල්ලෙන් 

"එයා රට ගිහින් මේක මං දැනගනිද්දි.මට ඕනේ වුනේ මුලින්ම එයාට කියන්න.ෆෝන් එකෙන් නැතුව මූණට කියන්න.ඒ මූණ වෙනස් වෙන හැටි බලන්න" ඒක කියනවත් එක්කම නදිනිගෙන් ඉකියක් පිට වුනා.කම්මුල් දිගේ කදුළු බේරෙන්න ගත්තා 

"හරි හරි දැන් අඩන්න එපා..ඔයා අපි ලග ඉන්නවනේ..ජීවක එනකම් අපි බලාගන්නම්.නේද සහන්?" සජිනි ඇහුවේ බය වෙලා බලන් ඉන්න සහන් දිහා බලලා.

"අහ් ඔව් ඔව් අපි බලාගන්නම්...බය වෙන්න එපා" සහනුත් කිව්වේ නදිනිගේ හිත හදන්න හිතාගෙන.

ආපහු එන ගමනේ සජිනියි නදිනියි දෙන්නා බබා ගැන වගේම එයාලා අම්මලගෙන් ඒ ගැන අහලා තියෙන එවා කතා කර කර ආවත් සහන් මේ කතා වලට සම්බන්ධ වුනේ නෑ.

"ඔයා එතකොට ඩොක්ටර් කෙනෙක් හම්බුනාද?"

"තාම නෑ...ජීවක ආවම යන්න කියලා හිතුවේ?"

"ඔයා කැමති පුතෙක්ටද? දුවෙක්ටද?"

"දුවෙක්ට" නදිනි කියද්දි සජිනි හයියෙන් හිනා වෙලා අත්පුඩියකුත් ගැහුවා.

"මාත් මාත්...මාත් කැමති දුවලට.හරි හුරතල් නේ එයාලා" සජිනි කියද්දි සහන් සජිනි දිහා බැලුවා

'මේ වගේ හුරතල් දුවෙක් නම් මාත් කැමතියි' ඒ හිතුවිල්ලටම සහන්ට හිනා ගියා

'ඉස්සර සජිනි දැක්කත් තරහ ගියපු මං මේ සජිනි වගේ දුවෙක් ගැන හිතනවා.මට පිස්සුද මන්දා' මේ හිතෙන දේවල් වලට  සහන්ට එයා ගැනම පුදුමයි

මේ අය ගෙදර එනකොට රෑ 10ටත් කිට්ටු වෙලා.ඒ නිසා ගෙදරට ආපු ගමන්ම කට්ටිය ගියේ නිදාගන්න.

සජිනි නාන කාමරේට ගිහින් එනකොට සහන් ඇදට වෙලා ෆෝන් එක බල බලයි හිටියේ.සජිනි කණ්ණාඩි මේසේ ලගට වෙලා කොණ්ඩේ පීරන්න ගත්තා

"කොහොමද දැනගත්තේ?" සහන්ගේ ප්‍රශ්නෙට සජිනිට හැරිලා බැලුවා

"මොකක්ද?"

"නදිනි ප්‍රෙග්නන්ට් කියලා"

"මට නිකන් තේරුනා"

"ඉතින් මට තේරුනේ නෑනේ"එහෙම කියන ගමන් සහන් ඇදෙන් නැගිට්ටත් කණ්ණාඩිය දිහා බලන් හිටපු සජිනිට ඒක තේරුනේ නෑ

"ඔයාලට ඕවා තේරෙන්නේ නෑ"

"අපිට තේරෙන්නේ නැති වෙන්න අපි බබ්බුද? කියනවකෝ කොහොමද දැනගත්තේ" සහන් කියද්දි සජිනි කොණ්ඩේ පීරලා ඉවර වෙලා ඇදට යන්න හිතාගෙන හැරුනා.ඒ හැරෙනකොටම සජිනිට පස්සෙන් අල්මාරියට හේත්තු වෙලා හිටපු සහන් දැකලා සජිනි ගැස්සුනා

"අම්මෝ...මං බය වුනා..හොල්මනක් වගේ ඉන්නවා මෙතන"සජිනි සහන්ව පහු කරලා යන්න හදනකොට සහන් සජිනිගේ අතින් අල්ලගත්තා.

"කවුද දන්නේ නෑ හොල්මන.කතාව මාරු කරන්න එපා.කොහොමද දැන ගත්තේ?" සහන් ඇහුවේ සජිනි ලගටම ඇවිත්

"ඉතින් එයා හරි මහන්සියෙන් වගේ හිටියේ..අච්චාරුත් කෑවනේ"

"අච්චාරු ඔයත් කෑවේ..ඔයත් ප්‍රෙග්නන්ට් ද එතකොට" සහන් අහද්දි සජිනිගේ මූන රතු වුනා

"අනේ මේ පිස්සු කියවන්න එපා...අතාරින්න මගේ අත.නිදාගන්න යන්න ඕනේ" සජිනි අත ගලවගන්න හැදුවා

"ඉන්න ටිකක්" සහන් එහෙම්ම ටිකක් ඉස්සරහට ගිහින් කණ්ණාඩි මේසේ උඩ තිබ්බ මොකක්ද කවරයක් ගත්තා.ඒකේ තිබිලා සහන් ගත්තේ ලස්සන කොණ්ඩ කටු වගයක්.

"මේ ගන්න..."

"මටද" සජිනි ඇහුවේ පුදුමෙන්

"නෑ තිළිණි අක්කට ගත්තේ.උදේට ගිහින් දෙන්න" සහන් කිව්වේ සජිනිට ඔරවගෙන.සහන්ගේ කතාවට සජිනි හිනා වුනා

"තැන්ක් යූ සහන්..කාර්නිවල් එකෙන්ද ගත්තේ..."

"නැත්තම් ඉතින්"

"හපෝ...පොඩ්ඩක් හොදට කතා කරොත් ඊට පස්සේ ගොරවනවා" සජිනි කියාගත්තේ තමන්ටමයි.

"මේ තනියෙන් කියවන්නේ නැතුව එනවා මෙහෙට නිදාගන්න"

සජිනිත් ලයිට් නිමලා ගිහින් ඇදේ ඇලවෙනකොටම ලොකු අත් දෙකකින් එයාව ඇදලා ගත්තා.

"සජිනි..."

"ම්ම්ම්..."

"දැන් මං ඔය කොණ්ඩ කටු දුන්නා නේද?"

"හ්ම්ම්..."

"ඕවා දුන්නේ ඔයාට..ඕවා එහෙම කාටවත් දෙනවා නෙවෙයි"

"මං කාට දෙන්නද?" සජිනි කරුවලේම හිනා වුනා

"කියන්න බෑනේ...දෙන්නත් එක්ක එළියට යමු කිව්වම නදිනිවත් එක්කගෙන ගියපු ගෑනිනේ...ඒකයි මං මේ කිව්වේ" සහන් කිව්වේ සජිනිව පුදුම කරලා.

*********************************************************************************

හෙට හම්බෙමු...

ආදරෙන් ඉන්න...💖

Monday, June 25, 2018

ආදරණීය නපුරා - තිස් දෙවන කොටස



 සෙනසුරාදා වුනත් සහන් වැඩට යන්න ලෑස්ති වුනේ වැඩ ගොඩක් හිර වෙලා තිබ්බ නිසා.සහන් ලෑස්ති වෙලා සාලෙට එද්දිමයි නදිනිත් සාලෙට ආවේ.

"ගුඩ් මෝර්නින්ග්" නදිනි හිනා වෙලා කිව්වත් නදිනිගේ මූණේ තිබ්බේ හරි වෙහෙසකර පාටක්.

"ගුඩ් මෝර්නින්ග්.මොකෝ සනීප නැද්ද?" සහන් ඇහුවේ ඒ වෙනස නිසාමයි 

"නෑ එහෙම එකක් නෑ.ඔයා කොහෙද මේ නිවාඩු දවසේ යන්න හදන්නේ?"

"අදත් වැඩ නදිනි.ඉවර කරගන්න බැරි වුනා ඊයේ"

"ඔයා ඒ ගමන් මගේ වැඩෙත් බලනවද?" නදිනි ඒ ඇහුවේ එයාට ජොබ් එකක් හොයන්න කියලා සහන්ට කියපු නිසා 

"අද ඒ කට්ටිය නෑ.සදුදා ඉන්නේ.මං සදුදට කියන්නම්"සහන් කිව්වේ ගේ ඇතුළ බල බල.එතකොටම සජිනි ආවේ සහන්ගේ කෑම එකත් අරගෙනමයි.සජිනිටත් බලපු ගමන් නදිනිගේ මූණේ වෙනසක් පෙනුනා 

"හා ඔයා බලලා කියන්නකෝ"

"හරි  එහෙනම් මං යනවා" නදිනිට එහෙම කියපු සහන් සජිනි දිහා බලනකොට සජිනිත් හිතලම අහක බලන් හිටියා.

'උදේට යනකොට කියලා යන්න බෑ,රෑට එනව මෙතන තරහද අහන්න' ඊයේ දුකෙන් හිටියට දැන් සජිනිට සහන් එක්ක තරහයි.

සහන් ගියාට පස්සේ සජිනි හැරුනේ නදිනිගේ පැත්තට 

"ඔයාට සනීප නැද්ද නදිනි?" සජිනි ඇහුවේ නදිනිගෙන් 

"එහෙම එකක් නෑ  අනේ.මේ සහනුත් ඇහුවා .රෑ නින්ද ගියේ නෑ හරියට.ඒ නිසා වෙන්න ඇති.ඔයාලා මේ නිකන් කරදර වෙනවා"

"නිකන් කරදර වෙනවා නෙවෙයි.අමාරු නම් කියන්න බෙහෙත් ටිකක් ගන්න යමු" 

"ඕනේ නෑ අනේ..ටිකක් නිදාගත්තා නම් හරි"

"හරි එහෙනම් ඔයා කාලා ටිකක් නිදාගන්න.මාත් මේ රෙදි ටිකක් හෝදන්න හැදුවේ" සජිනි කියනකොට නදිනි හිනා වුනා 

"දැන් අපි ලොකු වෙලා නේද? ඉස්සර රෙදි කෑල්ලක් හෝදපු මිනිස්සුද?" නදිනිගේ කතාවට සජිනිත් හිනා වුනා 

"කියලා වැඩක් නෑ..දැන් තමා තේරෙන්නේ අම්මලට අපෙන් කොච්චර කරදරයක් තියෙන්න ඇද්ද කියලා"

"අනේද කියන්නේ" 

"ඔයා කන්න..කෑම මේසෙන් තියලා තියෙන්නේ"

"ඔයාට කරදරේ මං ඇවිත්"

"පිස්සුද? කොහොමත් මේවා කරනවනේ.කාලා ටිකක් නිදාගන්න"

"ඔයා කන්නේ නැද්ද දැන්ම" නදිනි ඇහුවේ මේසෙන් වාඩි වෙන ගමන් 

"උදේම රෙදි හේදුවම ලේසියි.හෝදලා කන්නම් " එහෙම කියපු  සජිනි රෙදි හෝදන්න යන් දිහා නදිනි බලන් හිටියේ දුකෙන්.

'මේ දෙන්නගේ ප්‍රශ්නේ මොකක්ද දන්නේ නෑ.ඒ අස්සට මාත් ඇවිත් සජිනි මොනවා හිතනවද දන්නේ නෑ.ජොබ් එක හරි ගියොත් හොටෙල් එකකවත් නවතින්න ඕනේ ජීවක එනකම්'

මේ අතරේ සහන් ඔෆිස් එකේ වැඩ ගොඩක හිර වෙලයි හිටියේ.

"මේ අර රිපෝර්ට් එක හරිද?" විහග කාමරේට ආවෙම එහෙම අහගෙන 

"නෑ බං තාම...අර කෝඩ් එක තාම ඉවර නෑනේ" සහන් කිව්වේ පරිඝනකය දිහා බලාගෙනමයි.

"මොන" විහග සහන් ලගට ඇවිත් ලැප් එකට එබුනා 

"මේ මේක ඕනේ නෑ බං"

"ඕනේ නෑ කියන්නේ? " සහන් ඒ සැරේ නම් විහග දිහා හොදට බැලුවා 

"ඕක සෙකන්ඩ් ස්ටෙප් දාලා.උබ ඊයේ හවස හිටියේ නෑනේ.මුල් ටික විතරක් දාලා හදන්න කිව්වා.ඕකේ චේන්ජස් තියෙනවලු කරන්න" විහග කිව්වේ ඉස්සරහ පුටුවෙන් වාඩි වෙන ගමන් 

"මොන බම්බුවක්ද බං.මං මෙතන නැහීගෙන හදනවා.උබලවත් මට ඕක කියන්න එපා"

"ඉතින් උබ මොකටද කලින් ගියේ රැස්වීමට ඉන්නේ නැතුව.හරි හරි දැන් මුල් ටික විතරක් දාලා රිපෝර්ට් එක හදලා එවපන් මට 3ට කලින් "

"හරි හරි ඒක නම් බැරියැ..මේ ඒක නෙවෙයි මචන්" සහන් විහග දිහාට හැරුනා

"ම්ම්ම්..." විහග උත්තර දුන්නේ කටේ පෑනක් ගහගෙන පුටුවේ කැරකෙන ගමන්

"ඔන්න ඕක පැත්තක තියලා මේ අහපන්කෝ"

"කියපන් ඉතින් අහන් ඉන්නේ"

"උත්පලා තරහ වුනාම උබ මොකද කරන්නේ" සහන්ගේ කතාවට විහගට උඩ බිම බැලුනා.පුටුව කෙලින් තියාගත්ත විහග සහන් දිහාවට එබුනා 

"ඒකේ වගක් උබට මොකටද?"

"කියපන්කෝ බං..."

"හේතුව කියපන් මුලින්"

"එහෙම කියන්න හේතුවක් නෑ බං.නිකන් ඇහුවේ"

"සජිනි තරහ වෙලාද?"

"දන්නේ නෑ බං"

"දන්නේ නෑ කියන්නේ?  දැන් මොකෝ නදිනිගෙයි සජිනිගෙයි තත්වේ"

"ඒ දෙන්නා නම් මාර ෆිට්.ඉස්කෝලේ යාලුවෝනේ"

"වාසනාවට එහෙම වුනේ" විහග ආයෙත් පුටුවේ කැරකෙන්න ගත්තා 

"ඇයි?"

"ඇයි අහන්නේ? මොන ගෑනිද යකෝ කැමති මිනිහගේ කලින් කෙල්ල ගෙදර එනවට"

"මාත් හිතන්නේ ඒක තමා හේතුව" සහන් කිව්වේ කල්පනා කරන ගමන් 

"ඒ කියන්නේ දැන් සජිනි කතා කරන්නේ නැද්ද?" 

"නෑ වගේ තමා"

"ඉතින් යාලු කරගන්න බැලුවේ නැද්ද?" 

"ඒක තමයි මේ උබෙන් ඇහුවේ" 

"මගෙන් අහන්න දෙයක්ද බං.නදිනි එක්ක යාලු වෙලා හිටියේ උබ.හරියට මේ පලවෙනි සැරේට කෙල්ලෙක් තරහ වුනා වගේ දගලන්නේ.නදිනිව යාලු කරගන්න දාපු ටෙක්නික් එකක් දාපන්" විහගගේ කතාවට සහන් හිනා වුනා 

"නදිනි කවදාවත්ම තරහ වෙලා නෑ බං"

"මොකක් කිව්වා??" විහග අහපු සද්දෙට එලියේ වැඩ කරන අයත් සහන්ගේ කාමරේ දිහා බැලුවා 

"කෑගහන්න එපා බං.මිනිස්සුත් බලනවා" සහන් කිව්වේ තරහෙන් 

"හරි හරි මොකක්ද ඒ උබ කිව්වේ? නදිනි තරහ වෙලා නෑ කියලා"

"ඔව් බං.පොඩි පොඩි දේවල් වලට මට බැනලා තියෙනවා.ඒත් ඒක එතනින් ඉවරයි.අපි රණ්ඩු වුනා නම් රණ්ඩු වුනේ එයා බදින්න කියලා මාව අතැරපු වෙලාවේ.ඒකත් ඉතින් එයා මං කියපුවා අහන් හිටියා මිසක් වචනයක්වත් කිව්වේ නෑ" 

සහන් මේ ටික කියන වෙලාවේ විහග බලන් හිටියේ සහන්ගේ මූණ දිහා.වෙනදට සහන් නදිනි ගැන කියන විදියට වඩා මේ සැරේ සහන් නදිනි ගැන කියන විදිය වෙනස් කියලා විහගට කලින් ඉදන්ම තේරිලයි තිබුනේ.ඒත් මේ තරම් ලේසියෙන් මේ දේවල් කියන්න තරම් සහන් වෙනස් වුනේ කොහොමද කියලා විහග කල්පනා කරා..

සජිනි ගැන නම් සහන් මෙච්චර හිතන්න ගත්තේ වික්‍රම එක්ක වෙච්ච සිද්දිය නිසා කියලා විහගට මතකයි.ඒ සිද්දිය වුන දවස් වල ඉදන් සහන් ගෙදර යන්නම දැගලුවේ සජිනි ගෙදර තනියෙන් කියලා.

"කියපන්කෝ...." සහන් ආයෙත් ඇහුවේ විහගගෙන් සද්දයක් නැති නිසා 

"හ්ම්ම් හරි එහෙනම් උබ සජිනිව කොහෙ හරි එක්කන් පලයන්.ආස දෙයක් අරන් දීපන්.එයාට විශේශයක් කරනවා කියලා හිතුනම ඕක හරි යාවි" විහග කිව්වේ හොදට හිතලා 

"ඒකත් හරි තමයි.එහෙනම් කොල්ලෝ මං අද කලින් යන්නද?" සහන් අහද්දි විහග හිනා වුනා 

"යන තැනක පලයන් මට රිපෝර්ට් එක එවලා"

"හරි හරි දැන් උබ පලයන් එහෙනම් මට මේක හදන්න දීලා..." සහන් කිව්වේ ආයෙත් ලැප් එක දාගන්න ගමන්.දැන් සහන්ගේ ඔලුවේ තියෙන්නේ ඉක්මනටම ගෙදර යන එක 

"යකෝ....මූ බලහන්කෝ...හරි හරි අපි යන්නම් මල්ලි.හැබැයි රිපෝර්ට් නැතුව උබ ගියොත්නේ" විහග කිව්වේ පුටුවෙන් නැගිටින ගමන් 

"පලයන්කෝ මල කරදරේ " සහන් එහෙම කියන ගමන් ෆෝන් එක ගත්තේ සජිනිට කතා කරන්න.

දෙපාරක් රින්ග් වෙනකොටම සජිනි දුරකථනය ගත්තා 

"හෙලෝ..."

'සජිනි...මං"

"කියන්න..."

"මේ රෑට අපි කෑමට එලියට යමුද?" සහන් ඇහුවේ හරි පරිස්සමෙන් 

"හා..."

"මං 5ට විතර එනවා.6ට විතර යමුද?"

"හා.."

"එහෙනම් තියන්නම්" එහෙම කියපු සහන් බලන් හිටියේ සජිනි ආයෙත් මොනවා හරි කියනකම් 

"බුදුසරණයි" 

"බුදුසරණයි" සහන් එහෙම කියලා තිබ්බේ හිතේ සතුටෙන්.

කොහොම හරි සහන් වැඩ ඉවර කරලා ගෙදර එනකොට 5ත් පහු වුනා.එතකොට සජිනි සාලේ වාඩි වෙලා ටීවී බලනවා.පරක්කු වුන නිසා සහන් කෙලින්ම ගියේ ලෑස්ති වෙන්න.

සහන් ලෑස්ති වෙලා එනකොට මේසේ උඩ තිබුනේ ෆලූඩා එකක් 

'කොච්චර තරහ වුනත් ඒවා අමතක කරන්නේ නෑ' හිනා වෙවි හිතපු සහන් එළියට එනකොටත් සජිනි හිටියේ සාලේ වාඩි වෙලා 

"යමුද?" 

"ඉන්න ටිකක්.නදිනි ලෑස්ති නෑ තාම"

සජිනිගේ සහන් බැලුවේ පුදුම වෙලා 

'නදිනි? එයා එන්නේ මොකටද? මං හිතුවේ අපි දෙන්නා විතරක් යන්නනේ' සහන් හිතුවේ පසුතැවිල්ලෙන් 

*********************************************************************************

සමහර වෙලාවට මට ඔයාලගේ කමෙන්ට් වලට රිප්ලයි කරන්න වෙන්නේ නෑ ලමයි.හැබැයි මං ඒ ඔක්කොම කියවනවා හොදේ.ඒ නිසා මට කතාව ගැන කියන්න අමතක කරන්න එපා.ඔයාලාගේ අදහසුත් එක්කම තමයි ඉස්සරහ කතාව ලියවෙන්නේ 

හෙට හම්බෙමු.....

ආදරෙන් ඉන්න....💖💖

Sunday, June 24, 2018

ආදරණීය නපුරා - තිස් එක් වන කොටස


පහුවදා උදේ සජිනි නැගිටිනකොට සහන් ඇදේ හිටියේ නෑ.ඇදෙන් බැහැපු සජිනි සාලෙට ගියේ සහන් කොහෙද බලන්න.එත් සහන් සාලේ හිටියෙත් නෑ.සමහර දවසට සහන් උදේ ඇවිදින්න යන නිසා එහෙනම් එහෙම යන්න ඇති කියලා හිතුව සජිනි උදේට උයන්න ගත්තා.නදිනිගේ සද්දයක් නැති නිසා සජිනි හිතුවේ නදිනි නිදි කියලා.ඒ නිසා සජිනි නදිනිව ඇහැරවන්න ගියෙත් නෑ.

සජිනි කුස්සියේ උය උය ඉන්නකොට තමයි ඉස්සරහ දොර ඇරෙනවා ඇහුනේ.ඒත් එක්කම සාලෙන් කවුරු හරි කතා කරන සද්ද ඇහෙන්න ගත්තා.

"මං වොශ් එකක් දාගෙන එන්නම්" ඒ සහන් 

"සජිනි නැගිටලද?" ඒ ඇහුනේ නදිනිගේ කටහඩ.නදිනිත් එහෙනම් නැගිටලා වෙන්න ඇති කියලා සජිනිට හිතුනා 

"ඔව් මං හිතන්නේ....සජිනි...." සහන් කතා කරා 

"මං කුස්සියේ...." සජිනි සාලෙට නොගියේ එතකොටත් උයන්න පරක්කු වෙලා නිසා 

"මං ගිහින් බලන්නම්...." නදිනි කියනවා ඇහුනා 

ටිකකින් කුස්සියට එබුනේ නදිනි.ට්‍රැක් බොටමට සුදූ ටී ශර්ට් එකක් ඇදන් හිටපු නදිනි ඇත්තටම හරිම ලස්සනයි 

"ඔයා උයනවා නේද? මේ අපි පාන් ගෙනාවා උදේට.ඔයාට කියන්න අමතක වුනානේ.ෆෝන් අරන් ගියේ නෑ" නදිනිගේ කතාවට සජිනිට උඩ බිම බැලුනා 

"ඔයා කොහෙද ගියේ?"

"ඇවිදින්න ගියා...මං උදේ නැගිටලා එනකොට සහන් ඇවිදින්න යන්න හදනවා.මටත් යමු කිව්වා"නදිනි කිව්වේ ශීතකරණය ලගට යන ගමන්.නදිනිගේ කතාවට සජිනිගේ හිත කීරී ගැහිලා ගියා.ඇවිදින්න යනවා තියා සහන් ගෙදරින් යනකොට කියලා යන්නෙත් ඉදලා හිටලා දවසක.

"ඔයා උදේට කන්න හදලද? නැත්තම් මං බටර් ගාලා පාන් ලෑස්ති කරන්නද?" නදිනි ඇහුවේ ශීතකරණෙන් බටර් එක ගන්න ගමන් 

"මං නූඩ්ලස් හදන්න හිතුවේ නම්, එහෙනම් පාන් කමු" සජිනි කිව්වේ නූඩ්ලස් පැකට් එක ආපහු ඇතුලට දාන ගමන් 

"හරි එහෙනම් මං පාන් ලෑස්ති කරන්නම්.අපිට රෑට පුලුවන්නේ නේද නූඩ්ලස් කන්න" 

"හ්ම්..එහෙම කරමු" සජිනි කිව්වේ ලිප බලන ගමන් 

"පාන් නම් හරි....මොනවා හරි කරලා දෙන්න දෙයක් තියෙනවද සජිනි" නදිනි ඇහුවේ පාන් මේසෙන් තියලා ඇවිත්.

"නෑ නදිනි...මේ සම්බොලේ හදන්න විතරයි තියෙන්නේ.මං ඒක කරගන්නම්"

"එහෙනම් මං නාගෙන එන්නම්කෝ" එහෙම කියලා නදිනි යනකොට සජිනිට දැනුනේ හරි අසරණ බවක්.නදිනි කොච්චර හොද වුනත් නදිනි ආපු වෙලාවේ ඉදන් තමන් පිට කෙනෙක් කියලා සජිනිට දැනෙන්න අරන් තිබුනේ.

උදේ කෑම මේසෙත් නදිනි ලෑස්ති කරපු නිසා සජිනිට තිබුනේ සහන්ට ගෙනියන්න දවල් කෑම එක ලෑස්ති කරන්න විතරයි.සජිනි සහන්ගේ දවල් කෑම එක අරන් එනකොටත් නදිනියි සහනුයි මේසේ වාඩි වෙලා උදේ කෑම කනවා.

දෙන්නා හරි සන්තොසෙන් කතා කර කර කනවා දැක්කම සජිනිට දුක හිතුනා තමන් ගැනම.සහනුයි සජිනියි කවදාවත් ඔහොම මේසේ ඉදන් වාඩි වෙලා කතා කර කර කෑම කාලා නෑ.සජිනි අහල දේකට සහන් උත්තර දුන්නොත් ඇරෙන්න සහන් කතා කරන්නෙත් එයාට ඕනේ නම් විතරයිනේ.

"ඔයා කන්නේ නැද්ද සජිනි?" නදිනි ඇහුවේ සහන්ගේ කෑම එක අරන් ආපු සජිනිගෙන් 

"පස්සෙ කන්නම් නදිනි,ඔයාලා කන්නකෝ" සජිනි උත්තර දුන්නේ දුකෙන්.ඒ දෙන්නම උදේ නාලා නිසා හරි පිරිසිදුයි ලස්සනයි.ඒත් සජිනි තාමත් රෑ නිදාගත්ත ඇදුමෙන්.නැගිටලා කලබලේට උයලා නිසා දාඩියත් දාලා කොන්ඩෙත් අවුල් වෙලා.

'ඒ දෙන්නා නම් හැම අතින්ම ගැලපෙනවා.මං නාලා මේකප් දැම්මත් නදිනි තරම් ලස්සන නෑ.සහන් ඒ නිසා වෙන්න ඇති නදිනිට එච්චරම ආදරේ' සජිනි හිතුවේ දුකෙන්.

සහන්ලා කෑම කනකම් සජිනි ගේ අතු ගාලා අස් කරන්න ගත්තා.

"මං එහෙනම් යනවා නදිනි,කම්මැලි නම් මගේ ලැප් එකත් ඇති කාමරේ.අරන් මොනවා හරි බලන්න"

"හරි හරි මට මොන පාලුවක්ද සජිනි ඉන්නවනේ" නදිනි හිනා වෙලා කියද්දි සහන් බැලුවේ සජිනි දිහා.සජිනි ඒ දිහා බලන්නේ නැතුව හිටියේ ඇඩේවි කියලා බයට

"හරි එහෙනම් මං යනවා" එහෙම කියාගෙන සහන් ගියාට පස්සේ නදිනි දිහා බලන්නෙවත් නැතුව සජිනි කෙලින්ම ගියේ කාමරේට.

සහන්ගෙයි සජිනිගෙයි ප්‍රශ්නයක් තියෙනවා කියලා නදිනිට තේරුනේ ඊයේ ආපු වෙලාවෙමයි.ඒත් එයාලගේ පවුල් ප්‍රශ්න ගැන කතා කරන එක හරි නැති නිසා නදිනි ඒ ගැන කතා කරන්න හිතුවේ නෑ.ඒ නිසා නදිනි සජිනි තියලා ගියපු කොස්ස අරගෙන ගේ අතුගාලා අස් කරන්න ගත්තා.

කාමරේට ආපු සජිනි කෙලින්ම ගියේ නාන කාමරේට.අඩන්න ඕනේ වුනත් සජිනි ඇඩුවේ නෑ.පැයක් විතරම නාන කාමරේ හිටපු සජිනි එළියට ආවේ හිත හදාගෙන.නදිනි මෙහේ ඉන්නකම් මේ වෙන දේවල් ඉවසගෙන ඉන්නවා කියලා සජිනි තීරණයක් අරන් තිබ්බේ.

'සැරින් සැරේට අඩන්න බෑනේ.අනික මොකටද අඩන්නේ? අඩන්න දෙයක් වෙලා නෑනේ'සජිනි කල්පනා කරා.

සජිනි ආයෙත් සාලෙට එද්දි නදිනි බැල්කනියේ කල්පනා කරනවා.සජිනි හෙමීට එතනට ගියා.

"මොකද කල්පනාව"සජිනි අහද්දි නදිනි උත්සහ කරේ ඇස් වල තිබ්බ කදුලු පිහිදගන්න 

"ආ මේ ඉන්නේ..මං මේ බලන්න එන්න හැදුවේ? පැයක් මොනා කරාද අනේ" නදිනි හිනා වෙන්න හැදුවත් ඇස් වල නම් තාමත් කදුලු තිබ්බා.

"මොකද මේ අඩන්නේ?" සජිනි ඇහුවේ ඇත්තටම දුකෙන් 

"නෑ අනේ මුකුත් නෑ"

"මේ මෙහෙ ඉන්නකම් අඩන්න බෑ..අපි ඉන්නවනේ....ඔයාව හස්බන්ඩ්ට බාර දීලා මිසක් මෙහෙන් යවන්නේ නෑ" සජිනිගේ කතාවට නදිනි හිනා වුනා 

"හරි හරි..ආයේ අඩන්නේ නෑ.කෝ ඔයා තාම කෑවෙත් නෑ නේද? යමු යමු කමු"

"ගේ අතු ගාලා ඉවර කරෙත් නෑ අනේ"

"මං අතු ගෑවා...ඔයා දැන් යමුකෝ කන්න.මං ඉන්නම් ඔයා කනකම්" නදිනි කිව්වේ සජිනිගේ අතින් අදින ගමන් .

එදා දවසම සජිනිට පාලුවක් තිබුනේ නැත්තේ නදිනි හිටපු නිසා.ඉස්කෝලේ කාලේ විස්තරයි පරණ යාලුවන්ගේ විස්තරයි කතා කර කර හිටපු නිසා දවස යනවා තේරුනේ නෑ.

හවස දෙන්නා එක්ක නූඩ්ලස් හදන්න ලෑස්ති වෙනකොටමයි සහන් ගෙදර ආවේ 

"ආ මේ දෙන්නා උයනවා වගේ" සහන් කුස්සියට එබුනෙම එහෙම කියාගෙන.

"ඔව් අපි නූඩ්ල්ස් හදනවා නේද සජිනි?" සජිනි උත්තරයක් දුන්නේ නැති තැන නදිනි කතා කරා 

"ශා...ශෝක්නේ..හදලා තියන්න එහෙනම්.මං නාගෙන එන්නම්" 

සහන් ගියාට පස්සේ සජිනි පළතුරු යුශ එකක් ශීතකරණයෙන් ගත්තේ සහන්ට දෙන්න කියලා.ඒක වීදුරුවකට දාපු සජිනි නදිනිට කතා කරා 

"නදිනි මේක සහන්ට ගිහින් දෙනවද?" සජිනි නදිනිට ගෙනියන්න කිව්වේ සහන්ගේ මූන බලන්න බැරිකමක් හිතට දැනුන නිසා.උදේ සිදුවීම් තාමත් සජිනිගේ හිතට වද දුන්නා.

"අහ් හා..." නදිනිත් වැඩේ බාරගත්තේ සජිනිට බෑ කියන එක හරි නැති නිසා 

"මෙන්න..." නදිනි ගිහින් සහන්ට පළතුරු යුශ එක දෙද්දී සහන් මැච් එකක් බලනවා.

"ලයිව් ද යන්නේ?" නදිනිත් එතනම වාඩි වුනේ එයත් මැච් පිස්සියෙක් නිසා 

"ඔව්..දැන් පටන් ගත්තේ..ඒකනේ මං කලින් ආවේ"

"අනේ අනේ කියන ලස්සන විතරක්..වෙනදට මීට වඩා පරක්කු වෙනවද?'

"එහෙමත් නෑ.අද සිකුරාදනේ.සිකුරාදට පරක්කු වෙනවා.ඒ නිසා අද විනාඩි 20ක් කලින් පැන්න මං" සහන් හිනා වෙවි කියද්දි නදිනිටත් හිනා ගියා 

"හොරට පැනලා මදිවට ඒක කියන ලස්සන"

"වැරදි වැඩකට නෙවෙයිනේ..මෙන්න මේක අරන් යන්න.මේ ගෑනු නම් ඔක්කොම එකයි" සහන් බීලා ඉවර වුන වීදුරුව නදිනිට දුන්නා 

මේ මුලු කතාවම සජිනි කුස්සියේ ඉදන් අහගෙනයි හිටියේ 

'අනේ සහන් මාත් එක්කත් මේ තරම් නිදහසේ කතා කරනවා නම්,හිනා වෙනවා නම් කොච්චර දෙයක්ද? මං කරපු පවක්ද කොහේ මේ' සජිනිට හිතුනා 

රෑ කෑම කද්දිත් නදිනිටයි සහන්ටයි කතා කරන්න ඕනේ තරම් දේවල් තිබ්බේ දෙන්නම තොරතුරු තාක්ශන අංශයේ නිසා.සහන් අලුතෙන් කරන ව්‍යාපෘති ගැන දෙන්නා එක්ක කතා කරද්දි සජිනි තනියෙන් කෑම කෑවා.

'කුස්සියේ ඉදන් කෑවා නම් මීට වඩා හොදයි' සජිනි කන ගමන් කල්පනා කරා.

කෑම කාලා අස් කරලා නදිනිත් නිදාගන්න ගියාට පස්සෙයි සජිනි කාමරේට ආවේ.ඊයේ වගේම සජිනි කෙලින්ම නාන කාමරේට යන දිහා සහන් ඇදේ ඉදන් බලන් හිටියා.

'උදේ ඉදන් මූණ වත් බැලුවේ නෑ.හවසත් අහක බලාගෙන හිටියේ.ඒ පාර මොකටද දන්නෙ නෑ තරහ වෙලා තියෙන්නේ' 

'මං බැන්නෙත් නෑනේ..වෙන මොකක් හරි වැරැද්දක් වුනාද මගෙන්? නෑ එහෙම වෙන්නත් මං ගෙදර හිටියේ නෑනේ..දැන් ආවම අහන්න ඕනේ බලන්න' සහන් දිගටම කල්පනා කරේ සජිනි ඇයි කතා නොකරේ කියලා 

ටිකකින් සජිනි ඇවිත් පුරුදු විදියටම නිදා ගන්න ලෑස්ති වුනා.ඒත් අද සජිනි මුකුත්ම අහන්නේ නැතුව ඇදට නැගලා පුරුදු විදියටම සහන්ට පිටුපාලා ඇලවුනා.

ඒ දිහා ටිකක් බලන් හිටපු සහන් ලයිට් එකත් නිමලා ඇවිත් සජිනි ලගින් ඇලවුනා.

"මොකද වෙලා තියෙන්නේ" සහන් ඇහුවේ ටිකක් සැරෙන්.

"ඇයි?"

"ඔහොම ඉන්නේ?"

"කොහොමද ඉන්න ඕනේ?" 

"මොකක්ද සජිනි වෙලා තියෙන්නේ? දවසෙම මූණ නරක් කරගෙන.එක්කො වෙච්ච දෙයක් කියන්න ඕනේ.අනේ මන්දා මට නම් මේ ගෑනුන්ව තේරුම් ගන්න බෑ" සහන් තරහෙන් කියලා අනිත් පැත්ත හැරුනේ නිදා ගන්න 

'ඔව් මාව තමයි ඔයාට තේරෙන්නේ නැත්තෙ,නදිනි වුනා නම් හොදට තේරෙනවා'සජිනි හිතුවේ  කම්මුල දිගේ කදුලක් බේරිලා යද්දි'

*********************************************************************************

සමාවෙන්න ලමයි..ටිකක් පරක්කු වුනා...

ඔයාලගේ මැසේජ් ගොඩක් තිබ්බා.කතාව ලියන්න පරක්කු වෙන නිසයි රිප්ල්යි නොකරේ 

මැසේජ් වලට ස්තූතියි හැමෝටම 

හෙට හම්බෙමු 

ආදරෙන් ඉන්න 💖



Saturday, June 23, 2018

ආදරණීය නපුරා - තිස් වන කොටස


සජිනිව දැකලා සහන් ලග හිටගෙන හිටපු නදිනි සජිනි එක්ක අමාරුවෙන් හිනා වුනා.ඒත් එක්කම සජිනිගේ ඇස් ගියේ නදිනි ලග බිම තිබුනු ලොකු ඇදුම් බෑග් දෙකට.

"නදිනි ඔයා වාඩි වෙන්නකෝ..සජිනි නදිනිට බොන්න මොනවා හරි හදනවද?" එහෙම කියපු සහන් එතන පුටුවකින් වාඩි වුනා.


සජිනි ඇතුලට ගියාට පස්සේ නදිනි සහන් දිහා බැලුවේ පසුතැවීමෙන් වගේ.

"සහන්,මං ආපු එකට සජිනි කැමති නෑ වගේ..මං යන්නම්.ප්‍රශ්නයක් ඇති කරගන්න ඕනේ නෑනේ"

"මෙන්න මේ වාඩි වෙනවා..ඉස්සර ඉදන්ම හිතුවක්කාරකම නම් තිබ්බා.දැන් වත් මං කියන දේ අහනවා" සහන් කිව්වේ තරහෙන්.

නදිනි වාඩි වෙනවත් එක්කම සජිනි ආවේ එයා සහන්ට දෙන්න හදපු පළතුරු යුශ වීදුරු දෙකකුත් අරගෙන.සජිනි අමාරුවෙන් වුනත් නදිනි එක්ක හොදට හිනා වුනා.මුකුත් අහන්න නොගියේ මේ ගැන මුකුත්ම නොදන්න නිසා

"ඔයා ඕක බොන්නකෝ නදිනි..සජිනි පොඩ්ඩක් එන්නකෝ" එහෙම කියලා සහන් ඇතුළට ගියාම සජිනිත් සහන් පස්සෙන් ඇතුලට ගියේ මොකක්ද මේ වුනේ කියලා දැනගන්න.සහන් කෙලින්ම ගියේ එයාගේ කාමරේට.

"සජිනි මෙහෙන් වාඩි වෙන්නකෝ" සහන් එහෙම කිව්වේ ඇදෙන් වාඩි වෙලා.ඒත් සජිනි වාඩි නොවි සහන් දිහාම බලන් ඉන්නකොට සහන් නැගිටලා සජිනිව ඇදෙන් වාඩි කරවලා එයත් එතනින් වාඩි වුනා.සජිනි සහන් දිහාම බලන් හිටියේ සහන් මොනවා හරි කියනකම් 

"නදිනිව එයාගේ මහත්තයගේ ගෙදරින් එළියට දාලා සජිනි" සහන් එහෙම කියද්දි සජිනිගේ ඇස් ලොකු වුනා 

"ඇයි ඒ?'

"දෑවැදි ප්‍රශ්නයක්ලු"

"එයාගේ මහත්තයා?"

"මහත්තයා රට ගිහින් ,ඒ අතරේ තමයි මේ ප්‍රශ්නේ ඇවිත් තියෙන්නේ.නදිනිගේ තාත්තා හාර්ට් පේශන්ට් කෙනෙක්.ඒ නිසා නදිනිට මේ වෙලාවේ ගෙදර යන්නත් විදියක් නෑ."

"ඉතින් දැන් මොකද කරන්නේ?"

"එයා මහත්තයා එනකම් මෙහේ ඉදිවි.ප්‍රශ්නයක් නෑ නේද?" සහන් කියද්දි සජිනි සහන් දිහා බැලුවේ අසරණ විදියට.මොනවා කියන්නද කියලා සජිනිට හිතුනා.මේ නදිනි සහන්ගේ ආදරේ නොවුනා නම් මේ නදිනි නැතුව වෙන කෙනෙක් වුනා නම් මේක හිතන්න ප්‍රශ්නයක් නෙවෙයි කියලා සජිනිට හිතුනා.ඒත් නදිනිව මේ වෙලාවේ අතාරින්න බෑ.සහන් බලන් ඉද්දිම සජිනි ඇදෙන් නැගිට්ටා.

"මං එයාට කාමරේ ලෑස්ති කරන්නම්" එහෙම කියපු සජිනි කාමරෙන් යන්න හදනකොටම සහන් ආයෙත් කතා කරා.

"ඔයාගේ  ඇදුම් ටිකත් අරන් මේ කාමරේට එන්න"

"අහ්... හා" එහෙම කියපු සජිනි ගියේ නදිනිට කාමරයක් ලෑස්ති කරන්න.කොහොමත් නදිනිට පේන්න වෙනම කාමර වල ඉන්න එක හරි නෑ කියලා සජිනිට හිතුනා.

කාමරේ ලෑස්ති කරපු සජිනි නදිනිව එක්කගෙන ගියා කාමරේට 

"ඇදුම් මාරු කරලා වොශ් එකක් දාගන්න නදිනි,වැඩිය හිතන්න එපා.මහත්තයා ආවම හැමදේම හරි යාවි" සජිනි කිව්වේ නදිනි ගැන ඇත්තටම අනුකම්පාවෙන්.

නදිනි නැගිටලා සජිනිගේ අත් දෙක අල්ලගත්තා.

"ඔයාට පින් සජිනි මේ වෙලාවේ ඉන්න දුන්නට.මං දන්නවා වෙන කෙනෙක් නම් මෙහෙම කරන්නේ නෑ" නදිනිගේ ඇස් වලින් කදුලු බේරෙන්න ගත්තා 

"අනේ නදිනි අඩන්න එපා..අපි ඉස්කෝලේ යාලුවෝනේ..කෝ ඉතින් අඩන්න එපා" සජිනි නදිනිගේ කම්මුල් දිගේ බේරුන කදුලු පිහදුවා.

"වොශ් එකක් දාගෙන එන්න.මං රෑ කෑම හදන්නම්" එහෙම කියලා සජිනි නදිනිට ඇදුම් මාරු කරගන්න දීලා ගියා.

සහන් නාලා කාමරේට එනකොට සජිනි එයාගේ ඇදුම් සහන්ගේ අල්මාරියට දානවා"

"මෙච්චරද තියෙන්නේ" සහන් අහද්දි සජිනි ගැස්සුනා 

"තව ටිකක් තියෙනවා.ඒවා එහේ තිබුනාවේ.සති දෙකයිනේ" සජිනි කියද්දි සහන්ට හීල්ලුනා.නදිනි ආපු නිසා ඒ පිටින් දාලා හරි සජිනි කාමරේට එන එකට සහන් සතුටෙන් හිටියේ 

රෑ කෑම වෙලාවේ තමයි සජිනි හරියටම සිද්දිය දැන ගත්තේ.සහන් යාලුවෙක් එක්ක වැඩකට කොටුව ස්ටේශන් එකට ගියපු වෙලාවේ තමයි නදිනි බෑග් දෙකත් තියන් ඉන්නවා දැකලා තියෙන්නේ.සජිනි වගේම නදිනිත් ගෙදරම හැදුනු ගෑනු ලමයෙක්.ඉතින් යන්න තැනක් හිතාගන්න බැරුව ඉන්නකොටයි සහන් හම්බ වෙලා තියෙන්නේ.

"මහත්තයට මේක කිව්වද?" සහන් ඇහුවේ කෑම කන නදිනිගෙන් 

"නෑ...එයා ලොකු වැඩකට ගියේ.ඒක මග දාලා ආවොත් එයාගේ ජොබ් එකත් නැති වෙන්න පුලුවන් "

"හ්ම්ම්..." සහන් ඒ කතාවට මුකුත් නොකිව්වේ ඒක ඇත්ත නිසා.

"මහත්තයා කවද්ද එනවා කියලා තියෙන්නේ" සහන් ආයෙත් ඇහුවා 

"සති දෙකකින්"

"එතකම් ඔයාට මෙහේ ඉන්න පුලුවන් නදිනි" මෙච්චර වෙලා සද්ද නැතුව හිටපු සජිනි කියද්දි නදිනි වගේම සහනුත් බැලුවේ සජිනි දිහා.සජිනි සහන් දිහා බලලා හිනා වුනා 

රෑ කෑමෙන් පස්සේ නදිනි සහන්ටයි සජිනිටයි සුබ රාත්‍රියක් කියලා නිදාගන්න ගියා.සහන් කාමරේට ගියත් සජිනි පුලුවන් තරම් වෙලාවක් කුස්සිය අස් කර කර කුස්සියට වෙලා හිටියේ සහන් නිදාගන්නකම්.කලින් එක කාමරේ ඉදලා තිබ්බත් අද කාමරේට යන්න බැරිකමක් සජිනිට දැනුනා.

ඒ අතරේ සහන් කාමරේ බලන් හිටියේ සජිනි කාමරේට එනකම් 

'මේ කෙල්ල මෙච්චර වෙලා මොනවා කරනවද මං දන්නේ නෑ.කුස්සියක් කඩලා හදන්න යන වෙලාවනේ මේ' සහන් කාමරේ වටේ ඇවිදින්න ගත්තේ සජිනි නැති නිසාමයි 

ටිකකින් සජිනි කාමරේට ආවා.සහන් දිහා බැලුවෙ වත් නැතුව අල්මාරියෙන් ඇදුමක් ගත්ත සජිනි නාන කාමරේට ගියා.

සජිනි ආයෙත් එනකම් සහන් ඇදේ වාඩි වෙලා බලන් හිටියා.ආයෙත් ආවත් සජිනි සහන් එක්ක  කතා කරන්න ගියේ නෑ.කණ්ණාඩි මේසේ ලගට ගිහින් කොන්ඩේ පීරලා තමයි සහන් දිහා බැලුවේ.

"මං ඇදේ නිදාගන්නද?"

"ඒක අහන්නත් දෙයක්ද?" සහන් කිව්වේ පසුතැවිල්ලෙන් 

'ඒ අතින් නම් අනිත් කෙල්ලො වගේමයි.පරණ ඒවා මතක තියාගෙන නහින්න හදනවා.ඕක හෙටත් ඇහුවොත්නේ' සහන්ට සජිනි දිහා බලාගෙන හිතුවා 

සජිනිට නම් ඕවා ගානක් වුනේ නෑ.නදිනි ආපු එකෙන්ම හිත අවුල් ගිහින් හිටපු සජිනි ඇදේ ඇලවෙලා සහන්ට පිටුපාලා නිදාගන්න ලෑස්ති වුනා 

"ඔයා නිදාගන්නවද?" සහන් ඇහුවේ නිදාගන්න හදන සජිනිගෙන් 

"ඔව්" 

"ලයිට් එක නිමන්නද?"

"හා" සජිනිගේ කෙටි උත්තර වලින්ම ප්‍රශ්නයක් තියෙන බව තේරෙන්න සහන්ට වැඩි වෙලා ගියේ නෑ.සහන් හිතුවේ ඒ නදිනිව එක්කන් එන බව සජිනිට කිව්වේ නැති නිසා කියලා 

ලයිට් නිවපු සහන් ඇවිත් ඇදේ ඇලවුනා.තමන්ට පිටු පාලා ඉන්න සජිනි දිහා බලාගෙනම සහන් කතා කරා.

"නිදිද?"

"හ්ම්ම්..."

"තරහද?"

"මොකටද?"

"නදිනිව කියන්නේ නැතුව එක්කගෙන ආවට"

"නෑ"

"බිත්තියක් බලන් උත්තර දෙන්නේ ඇයි බිත්තියද කතා කරන්නේ?" සහන් ඒ සැරේ කිව්වේ සැරෙන්.එත් හිත රිදිලා හිටපු සජිනි කතා කරේ නෑ.

"සජිනි...." සහන් ආයෙත් කතා කරා.

"ඒ සැරේ සජිනි සහන්ගේ පැත්තට හැරුනා.අත් නැති ලොකු ටීශර්ට් එකක් ඇදන් හිටපු සජිනිගේ මූන දිහා සහන් ටිකක් වෙලා බලන් හිටියා.සජිනිගේ මූනට වැටිලා තිබ්බ කොන්ඩ කෑල්ලක් අයින් කරපු සහන් සජිනිගේ අතින් අල්ලගත්තා.

"තරහද?" සහන් ආයෙත් ඇහුවා 

"නෑ අනේ.." ඒ සැරේ සජිනි කිව්වේ තරහෙන්.

'එකම ප්‍රශ්නේ අහනවනේ මේ මොඩයා..මීට හොදයි බිම නිදාගත්තා නම්' සජිනි එහෙම හිතද්දි සහන් සජිනිගේ අතින් ඇදලා එයා ලගට අරන් තුරුල් කරගත්තා 

"ඇයි මේ?" සජිනි ඇහුවේ බය වෙලා 

"ඇයි මොකක්ද?" සහන් සජිනිගේ ඔලුව උඩින් නිකට තියාගත්තා 

"මේ මෙහෙම..." සජිනිට කියන්න වචන එන්නෙත් නෑ 

"ඇයි මොකක්ද ප්‍රශ්නේ? මිනිහට බැරිද ගෑනිව තුරුල් කරගන්න.ඔයා අර ටීවී එකේ කතා බලනවා වැඩියි"සහන් හිනා වුනා 

"ඒ වුනාට ඔයා කලින් කිව්වේ..."

"කලින් කියපුවා වැඩක් නෑ...මෙන්න මේ නිදාගන්න පණ්ඩිත නොවි"  සහන් කිව්වේ ඇස් පියාගන්න ගමන්.

සහන් ලගට වුන සජිනිත් නිදහසේ ඇස් පියාගත්තා.

*********************************************************************************

හෙට හම්බෙමු...

ආදරෙන් ඉන්න 💖💖


මන්දාරම් අහස යට - දහතුන් වන කොටස

"මං ආදිත්‍ය.අසේලිගේ බෝයි ෆ්‍රෙන්ඩ්.ඔයා කවුද?" ආදිත්‍ය කියද්දි ගගනගේ වගේම අසේලිගෙත් ඇස් ලොකු වුනා. "මං කැම්පස් එකේ...